Maand: juni 2013

De aarbei’n oogst is in volle gàànk. Emmers wordt er èplukt en op de stoete of beskute doan of zelfs nog in de yoghurt doan. Het mut neet gekker wörn…(of wie wordt zelfs nog un aardbeie).
Wat he’w dit joar wier beste aardbei’n. Het zal’wà an un mes lingn. Echen stalmes he’k t’r op èdoan van Jan van‘n Dol. Best spul van boetnlaandse beeste. Oetèèndelijk geeldt hier dan: ”Wa’j van veer haalt is lekker lekker”!

Gisteraownd noar het Zunnewendefestival in Heldern ewes. Dit is een muziek en vertelfestival in het plat, de moodersproake. Doar warn optrèèns van artiesten die in het plat zungn, doar wörn gedichen vuuredrèèngn en verhaaln verteeld en goat zo mèèr duur. Ie konn ok nog met ne boot oawer de Regge vaarn en dan onderwiel noar un verhaal lustern. Op het festival wörn ok de Johanna van Burenpries oeteriekt an Daniël Lohues. helaas gen optrèèn ezeen van hum. Mear doar wörn wa op het podium un gedich vuuredreangn van Johanna van Buren “Vieulties”. Dit gebuurn duur de wichter van de lèègere skole oet Heldern.

En dit gedich is dan het brugke noar’n twee’n foto.

Want gistern he’k ok de viooln oet’n tuin ehaald. Zie warn kets oetebleuid en doar was gen plezeer mear an te beleewn. Ie wörn er al depressief van ai d’r noar keekn, zo oetebleuid….Helpt gen Prozac vuur.
Het is mooi um te zeen hoe zonne viole zich vermeerdert. De zöadjes zit in’ e zoaddeuze. Nog heel mooi gerangschikt. Dor zit un bepaalde logica achter. Hoe stoppe ie zovölle meugelijk zöadjes in un zoaddeuze. zogedöanig dat ze allemoal d’r oet könt springn.  Met as de zoaddeuze lös geet, springt de zöadjes alle kaantn op. Maximale chaos. Op zonne maneere hef het viooltje de grootste kàànse um zich te vermeerdern. Dus neet un paar zöadjes die allemoal eene kaante op goat, mear völle zöadjes die alle kaantn opgoat. En doar zit ok wier un bepaalde logica achter.

Het was wier drok in de weeide. Un hele koppel spröan pikn piern of emeltn oet het grös. Doarnöast vleungn de zwaalven ok nog lèège oawer het grös. Ik heb het mear eanw annegèèwn in’n foto. Spröan veen ik un mooi doalect woordt. Ie hebt eene spreeuwe en twee spröan. Dat woordt kuj zo lekker duurn nèuze (nasaal) oetsprekn.

Mien nichtje en neefje hebt eawn de gekke vief minuutn…
Och,  wie heft doar gen last vàn (van gek doon). Sommigen doot dit nog wàl langer dan vief minuutn. Ie könt ok zengn dat er genog leu bint die nog neet vief minuutn gewòòn  normaal kunt dòòn!

En joa, het was vanmoarn zo vèèr, het hef èvreurn an de groond! Het is dus zommer mear met weenterse temperatuurn. Tied um de schaatsen oet’t vet te haaln en de lange oonderbokse wier an te doon (tenminste aj um àl oet hadn èdoan). Vandaage et wie stampot moos en morn et wie aarvensoep. De Friese Elfstedenverenging hef de rayonhoofden in een spoedvergadering bie mekaa èröpn. Het zol is könn duurvreezen! Ik zolle neet raar stoan te kiekn  dat ze met dizze temperatuurn met oliebolln langs de duurn goat vèèntn. Het is tied um un kachel wier op te stokn…

En doar heurt ok un weenters plaatje bie. Dit bint de baargen van de “Hohe Tauern”in Oostenriek. Het thema het “Die Sonne bricht nach dem Schneefall dürch die Wolken”. Zeer passend bie dit weer.

ps. Ik binne neet op vakàànsie mear dizzen fote he’k gewoon ènömn van’n kalender. Möt könn.

De waskeliene is wier èmaakt. Twee drèu wàn èknapt, dus het wòrn tied om dit te repareern. Ku’j nautuurlijk wier un foto van de dag van maakn…

Het nieje Windows logo is oet! Nò met un “greun” uuterluk, want dat is rechtevoort belangriek. Het möt greun, duurzaam en innovatief wean!
Greun is’t zekers, duurzaam ok wà, want un beton sloaj neet zo kapot en innovatief is’t helemoal want ie vernemt neet dat er un roete inzit (döt ok neet, mear wie maalt doar nò umme).

Un sloat slöt an! Noa un kleine dree wekn niks te hemn doan, is vuurige wekke plotsklaps un sloat beginn te kiemn. Ik stönne op het peunt de beks leug te gooin, mear klaorbliekelijk he’k dat oawer ebrach op de zöadjes, want die kreegn d’r opeens zin in.
En no mear wochen totdat ‘n krulslaot (“Lollo Bionda”) bie mie op’n teelder lig te krulln.

Un berichtje van oonzen stearnwachter in Lochem:

‘Supermaan’ zaterdagnacht te zien
Als het weer meezit, is zaterdagnacht een zogeheten supermaan te zien. De maan is dan vol en staat het dichtst bij de aarde.  Hij ziet er dan veel groter en helderder uit dan anders. De supermaan is maar eens per jaar te zien, op of rond de langste dag, zegt een woordvoerder van Publiekssterrenwacht Phoenix in Lochem.

Ik deanke dat ze vanoangd in Lochem aander weer hebt dan bie oons in’n Waterhook. Het is hier gries, bewolkt, nat én genne moane!
Het zoll könn dat ze in Lochem hogere gebouwn hebt zodat ze meender las hebt van wolkn!  Kloarbliekeluk hebt ze in Lochem bie de Steernwacht in un hoge flat ebouwd. Dat zol boangstoanden foto dan ok könn verkloarn. Un ondersen foto gef het weer bie ons an. Naans genne supermoane te bekenn…