Maand: april 2014

In’t vuurjoar goat alle vogels wier nösseln, zo òk de sproan. Die wilt het leewste oonder de dakpann van het hoes kroepn um un nös te maakn. Gelukkig is het dak an de oonderkàànte met plastic stripn dichtemaakt. Mear de leste dage heurn wieleu un drok lawaai vanoet het dak van de badkamer. Doar is één kozien van rot (da’s echt gen goeiigheid…) en de sproan konn via het gat in het kozien  un nös maakn oonder de pan’n. En at dat nò heel rustig en beschaafd gung, mear nee, het gung van dik hout zaagt men planken. Un lawaai `s morns op het dak, hele täkke en stukke stro wörn noar binnèslept vuur het nös. En as ze oetrössen dreetn ze de boele vanaf un ràànd van het dak ok nog oonder.
Dus doar he’k un stökn, of nog better, un plänkn vuurestökn. Het verdeent de schoonheidsprijs neet, mear het is wàl effectief. Gen last meer van de sproan oonder het dak!

Ken ie het liedje (of leedke) van Normaal nog? Het refrein gung as volgt:

hie kik ow an, hie kik ow ok an
hie kik ow an, hie kik ow ok an
hie kik ow an, hie kik ow ok an

Of wel een zeer gecompliceerde tekst. Op zien Tweants: slim ingewikkeld.
Ik mosse hieran deankn (an un tekst en an de gecompliceerdheid hiervan ) toe’k dit schoap met ziene gelle bolle oongn op’n foto zettn. Het schoap kik mie an met un zeer intense meuilijke blik. Het lik wàl offe wil zengn “Mut dat nou?”

Un geeteling in’n top van’n conifeer hà der duudelijk plezeer in vandaage. Hee fluitn der op los of dat het niks was. Het leek wà of het iedereene mos heurn dat het vuurjoar is. Dus bij deze, het is vuurjoar!

Mien’n sloat is in un heel rap tempo onhooge kömn, ondàànks dat het bloond, dikke en troagscheetend is… Het is zo hard ègoan, dat het nò het köpke löt hangn. Zol het lichtelijk depressief wean? Ik zol het de kommende dage mear loatn wenn an het harde boetnleawn, want ik wille straks wà met un positief geveul un kröpke sloat oet’n hof haaln…

Wat is Koningsdag zonder un mooin optocht woer de muziek vuur op löp? In Eanter gebuurt dit nog steeds. Loaw dit mear mooi zo hooln in plaats van un rommelmaarkt wa’j in de ààndere plaatsen zeet.

In het kader van “Oranje, dat past bie oe!”, harn de “de meaks van’n snoepkroam” zich kets in het oranje oettedost.Het völ neet op…

Ik bin vandage begunn met mien meest favoriete vuurjoarskarweitje: Het schoonemaakn van de tuinset. Dit doo’k op de oolderwetse maneere met un emmer water met wat soda en un harn bössel. Ie könt het verschil good zeen! Ie könt er ok wàl speciaal hardhoutentuinsetschoonmaakmiddel vuur koopn, mear un betje soda waarkt net zo good en is ok nog völle goedkoper (€ 0,69 vuurn zäkn soda)!
Un foto döt mie deankn an un wasmiddelnreclame woer t-shirts wordt èwasket met product X.  Ik hà un zak soda in’n leenkerstool könn lengn mear ik nemme dat het zo ok wà duudelijk is wa vonn ik heb schoonemaakt!

Op de fotoclub he’w oons vanoangd bezig èheuln met miniatuurfotografie. Foto’s maakn van kleine pupkes in een verassende omgeving. Dit leawert toch wier mooie foto’s op!

Wa’k ze toch wier hoaste vergetn te pottn dit joar: miene dahlia’s. De boernbloomn bie oetstek.
Zie stönn nog in un grote deuze op de delle te wachen. Ik had ze net zo good ofgeloopn joar in de groond könn loatn zittn umdat het nauwelijks hef èvreurn.  Ik heb ze vandage dus mear gauw in’n hof èpot, zodat ze straks in alle weelderigheid könt bleuin…

De weidn staot er wier vol met: Peerebloomn.  Teminste, at er neet teangn èspuit is duur de boern. Dit exemplaar hef het owaerleawd en zorgt er op ziene eengste maneere vuur da’w  tookn joar ok wier könt geneetn van de gelle bloomn.

Vandage de traditionele Tween Poasdaglòòp édoan. Den doo’k elk joare um de eier van’n Earsen Poasdag sneller te verbrààndn…
Het was vanmorn mooi loopn oawer un ni’jn fietspad langs de Regge. De zunne schean nog volop. Later op’n morn wörn het bewolkt en  begun het te reangn, mear toe wa’k ter à wier.