Elken dag nè foto
Noadeel van grös is dat het in het vuurjoar knap hard greuit. Doarumme he’k vandage un trekker met cyclomeaier bie mie moo oet de schure haalt en bi’k ter met noar’n Waterhook èveurt. “Henk trekt de wijde wereld in”. Bie het nie’je oole hoes he’k de boele un betje oppeglad. Het was wà neurig. Het ligt er nò wier mooi kàànt bie! Mear dat geeldt alleanig vuur dizze en tookn wekke, want doarnoa is alles wier beginn te greuin en kààn’k wier opni’js beginn.
Um nog eawn terugge te kommn op het tweeduustoer of’n oelenvloch: At het nog ietskes duusterder is èwörn, köj hele mooie foto’s (met statief, neet oet de lösse hàànd) maakn van gebouwn met op de achtergroond de gekluurde loch. Dizzen foto he’k èmaakt van het kantoorgebouw van Reggefiber in Riessen. Ik heb het wà un betje bieèwaarkt in Photoshop.
De ofgeloopn dage zeew ‘s aongs bie oons un klein uulke in’n boom zittn. Zo op un foto lik het nog wàl heel wat, mear het is un klein deenk. Elken aongd strikke neer in de grote conifere in’n tuin. Dat gebuurt meestal as de zunne net is oonderègoan ofwel in’n tweeduuster of’n oelenvloch!
Het was vandage eigenlijk ene grote buuije den ter väl. Ik mosse noar Amsterdam en de hele weg van Eanter noar Amsterdam bleaf het reangn. De roetnwissers bleawn an. Toe’k wier terug gunge was het van het zelfde laakn un pak, de buuije gung gewoon wier met mie terugge. En dat op un dag vuur Hemmelvoart, woeneer het zo lekker dròk op de weg is. Dat warn dus oonderweg völle files en làngzaam jaangde auto’s. Tied um te onthoasten ha’k genog…
Wat n`’e buuije ha’w vanmiddag wier. Het liek wà ow hier nè moesson kriengt. Zo völle water is ter èvölln. Aaltied wier good vuur un karakteristiek plaatje!
Vandage het leste deel èkekn van un breuierige en làànkzame politieserie. De serie het “True Detective” en spölt zich of in de moerasgebieden (bayoux) van Louisiana. Heel mooi in beeld èbrach, met oole vervaln gebouwn, industrie wat in verval is èraakt en völle armood. Ik hebt er 25 joar geleane stage eleupn op de Louisiana State University en sommige zaakn komt mie heel bekeand vuur. Vuural het breuierige weer en vlakke làànd bint mie bie èbleawn.
De intro van dizze serie is heel mooi in beeld èbrach. Foto’s van leu met doarin wier foto’s van de omgeving. Ai dè kààns kriengt, muj dizze serie is downloaden en bekiekn!
Wie mon’n vandage op visite bie kunnigen van oons die in Zeddam woont, in’n Achterhook. Ofwel, zo ai dat zengt, zie woont in’t Geelderse. Oonderweg was ter van alles te zeen, dus vandoar onderstoande foto’s. Moch ie weatn woe dit allemaol is, dan mu’j mie dit mear loatn weetn. Dan maak ie kààns op de volledig onverzorgde voetreize naar Zeddam!
Het was vandage un drokke boele in Eanter umdat er de gecombineerde Gàànzenmaark en Kaarkpleinmaark wörn èheuln. As fotoclub stönn wieleu op de Gàànzenmaark, mear as persoon stun ik met miene bloomn- en greunteplààntn op de Kaarkpleinmaark.
Onderdeel van het hele gebuurn was ok het rad van fortuin. Doar ko’j mooie prieze winn! Noa völle andringn van de verkopers he’k un antal lötjes èkoch. Mosse nog wàl deepe in de knippe tassen mear het was vuur un good doel. Zie zearn ok dat het raa mos loopn a’k niks zòlle winn. Dus ik zagge à vuur mie da’k met beste prieze noar hoes zòlle goan, zoas un grootn vleisschöttel, un fruitmààne, flesken wien en goat zo mear duur. De vrouwe wörn hetzelfde vuurèspeegeld, en den kochen ok vuur un aardig kapitaal an lottn. Un zommer koompt er an en is nog wàl un deure tied, dus un betje extra is mooi met ènömn, dachen den.
Helaas gung het neet zoas wie het harn èhopt. Genne eankele pries op oonze duurbetaalde lottn! Doarenteang warn er ààndern die met un paar lötjes alle priezen wönn, zoas den kearl (Jan Scholten vuur de bekeandn) hieroonder met dat greun-gelle shirt. De vrouwe en ik warn neet echt blie met de resultaatn. Het was nog wàl zo mooi èzeg: “Het mut raar loopn ai niks wint!”. Het leup dus raar. Dat wordt dus een mager zommer zoonder barbeque, lange zommeroangde met hapjes en un gleaske wien. Un stukn dreuge wos en un stukn keaze kan der miskien nog van of in’t weekend.
Het slimste was da’w ‘s oangns op de oetvoering van muziekvereniging Irene precies hetzelfde metmaakn. Ok wier un lotterieje met völle en mooie priezen. De knippe op’n lop èheuln um de leste lotn te koopn, mear hetzelfde as ‘s morns: genne eankele pries. Dus vanaf nò het kommende joar genn lottm mear koopn umdat het raar kan loopn.
Ai op visite goat en ie stoat bie de duure, dan wordt er vake duur de leu èzeg: “Komt erin, dan köj d’r oet kiekn!”. Ik veen dat mear raar zengn. Ie stoat boetn en dan muj noar bin’n hen zoda’j wier noar boetn könt kiekn. Dan köj toch völle better boetn bliewn stoan? Doar köj gewoon um oe hen stoan te gloepn en dan zeej nog völle mear dan da’j binn bint. Ie komt toch neet op visite um noar boetn te kiekn? Ie komt op visite um te kuiern en te heurn wat er allemoal wier spölt in de buurte: “Hej’t àl èheurt?” Dus better is te zengn “Komt erin, dan köw t’r is eawn oawer hemn!”.
In dit geval kiek ie bie oons ni’je oole hoes ok d’r oet. Ie kiekt liek op ‘n hof woer achterin de eapeln à opkomt en woe’w an eane van’n zommer hoppelijk mààn’n te kot komt um al die eapeln in te doon….
Vanoangd haw un oetstapje van fotoclub Tiedverdrief. Op un lessen oangd van het seizoen bi’w de wiede wereld innètrökn (net as Bartje) um foto’s te maakn. Het begun wat te reangn toe’w weggungn, mear al met al völ het wàl met met ‘n reangn.Wie heb het dröge heuln!
Wie bint noar Binnengait, un ooln schippersherberg met oole schöppe èwes en noar de ni’je vistrapn in’n Eantergraawn. Al met al warn dit twee mooie (en interessante) steas um foto’s te maakn.
