24 juni 2014 – Pöln

Behalve un sloat van gistern bint de pöln ok riepe um èplukt te worn. De pöln bint onderdeel van de “vlinderbloemigen”,`één van de grootste femilies van bleuiende plààntn in de wereld. Het kenmaarkende van deze plààntn is dat ze pöln vormt. Mear woerumme dat ze vlinderbloemigen heet, wèè’k neet. De bloomn liekn neet op un vlinder, mear miskien is het dat ze bezoch wordt duur vlinders (mear dat wordt de ààndere plààntn ok wà). Ai kiekt noar de naamgeving van de bloome dut het juust mear an un zeilboot deankn. Het grootse bloomnblad neumt ze de vlagge, terwiel de twee kleine blaadjes “zwaarden” wordt èneumd. Twee vergreuide blaadjes bie’n stengel oonder an de bloome neumt ze de “kiel”. Dus het lik mie better um dizze plààntnfemilie in plaats van vlinderbloemigen mear zeilbootbloemigen te neumn! Ik misse dan alleanig het zeil nog, mear doar köj van zengn dat het was èstrekn in verband met een stormwaarschuwing…

24 juni 2014

23 juni 2014 – Het sloatseizoen is geopend

Vandage he’w het sloatseizoen 2014 officieel lös èdoan met het plukn van’n eerstn krop sloat oet’n hof. Dat was in dit geval eeknbladsloat. Doar zölt er nog völle volgen in de kommende wekn umda’k in eene keer veerntwintig kröpkes heb oettepot (dikke, bloond en troagscheetend). Die veerntwintig kröpkes bint no zotoverdan riepe dus dat wordt de kommende wekn alleanig mear sloat ettn bie de eapeln, ries, macaroni, spaghetti, soep, pannekooke enz. totdat het de oorn oetkoomp! Kommende wekn et wie dus sloat met wat erbie.

23 juni 2014

23 juni 2014 b

22 juni 2014 – Het roadsel van de missende waskelapn

Nò wa’w seends van weenter àl un paar waskelapn kwiet, mear wie kon’n ze neet wier veendn. Oaweral èzoch mear zie wàrn kloarbliekelijk oppelöst in de waskemachiene. Totda’k van wekke bie het zuigen in de kökn het töafelke opzied schöaf (dit gef genne indicatie oawer hoe schone het bie oons is). Doar learn ze op de verwarming. Ik deanke dat ze no wàl good dreuge bint èwörn…

22 juni 2014

21 juni 2014 – Disperoat

Aj zo op’n zoaterdagmiddag meu en bezweet oet’n tuin komt, dan he’j wà döss. Dan bi’j disperaot op zeuk noar un lekker koold pilsje. En zeet es hier, de oplössing vuur dit. Desperados!
Ik zolle alleanig neet weatn wat dit maark beteaknt…

21 juni 2014

20 juni 2014 – Open dag

Vandage haw un open dag op het ni’je bedrief van de oole buurn. Kearl, kearl, wat ‘n volk kwam der op of. Doar was wàh mèèr dan doezend man èwes. Natuurlijk kwämn dur ok heel völle boern die woln kiekn noar de leste snufjes op veehouderijgebied. En die ko’j hier zeen! Het is un compleet èrobotiseerd bedrief! De beeste wördt èmölkn met ne robot en zie wordt ok nog èvoord duur un robot. Nog eawn en ie hebt helemoal genne boer meer neurig op dizze bedrieve want dan wordt alles duur robots èdoan. Dan loopt er alleanig mear Archie’s roond, de man van staal. Archie was un èèrsen robot den ik leern ken’n. Archie kwam vrogger vuur in de wekkelijkse editie van Sjors en Sjimmie van de rebbelenclub (miskien bekeand bie de ooldern oonder oe? Glimlach). Archie hef kloarbliekelijk deepe indruk op me èmaakt want àànders zò’k het nò neet meer weatn.
Miskien köw wà un ni’je strip van Archie oetgeawn met as titel “Archie, de man van staal leert melken”. Ik wolle neet gearne de koe wean den hier het slachtoffer van wörn…

20 juni 2014 b.jpg

20 juni 2014

20 juni 2014 c

19 juni 2014 – Dubbeltjesgaas

Un foto van dubbeltjesgaas wat gen dubbeltjesgaas mear mag heetn. Vanof 1 januari 2002 is de roemruchte euro innevoerd. zoda’w bie het passeern van de greanze gen boetnlàànds geelds mear hoowt te wisseln. Wat’n gemak he’w der van! Wie goat wà 2 keer per joar near het boetnlàànd, dus dat schealt toch wier 10 minuutn wisseln op joarbasis. Doarmet is het dubbeltje ok offeschaft, bron van sprekwoornd zoas “een dubbeltje op zijn kant”of “als je voor een dubbeltje geboren bent, word je nooit een kwartje”. Doarumme heet dit gaas gen dubbeltjesgaas meer, mà heet het “1 euroceant” gaas. Dit umdat ‘n euroceant qua grötte het dichtse bie het dubbeltje steet. Mear umda’w ok gen 1 euroceantn mear gebroekt in Nederlàànd, stel ik vuur um het dan “10 euroceantgaas” te neumn, Dat is de klèènste euromeunte de’w nò hebt. En umdat 10 ceant geliek is an 1 dubbeltje, bliewt wie het oeteindelijk toch dubbeltjesgaas neumn. En doarmet is un ceerkel wier roond!

19  juni 2014

18 juni 2014 – Schaastreapn

Soms kost nog wà knooin um un foto te maakn. Mear het lukt aaltied op de een of ààndere maneere net nog wà. Dizzen foto is zo’n vuurbeeld. Op het lessen èmaakt mear het gef heel mooi wier wat lien’n in’n foto doot. De schaastreapn van de beume leidt het ooge vanzelf noar het milln van’n foto. Ik wille wenn da’j helemoal neet kiekt noar de leenkerkàànte van’n foto, alln andach geet noar het milln van’n foto hen. Nò ist òk wà zo dat an de leenkerkàànte niks biezeunders te zeen is, dus zo slim is het neet…
18  juni 2014

17 juni 2014 – Ik hoole oe in de gaatn

Het peerd van de buurn kik net duurn geatje in de (lilukke) conifeern noar mie in’n tuin. Het lik wàl offe wil zengng “ik hoole oe in de gaatn!”. En dat klopt ok nog want hij kik duur dat geatje. Dus doar koomp die zegswieze van!

17 juni 2014

16 juni 2014 – Pötje

Vandage un foto oet miene reportage “Pötjes of the world”. Ik heb em nog neet helemoal kloar, mear scheete àl aardig op.

16 juni 2014