Maand: augustus 2014

Het is vandage “oole koninginnedag”, want op dizzen dag was de oole koninginne jeurig. Nee, het is gen Beatrix of Juliana, mear Wilhelmina! Den was op 31 augustus jeurig, en vrogger (weej nog, van veur 1948…) hadn ze op dizzen dag koninginnedag.

Om dit heugelijk feit te viern he’k vandage mear un keer vaker èdeeld met Wilhelmina peppermeuntjes in de kaarke, mear niemand begreap dit. Zol dit de generatiekloof wean? Of het missende nationaal geheugen?

Dizze wekke klaangn de waterleidingsmaatschappij Vitens dat ze bange warn dat ze in de toekomst gen good water mear könt leawern in Nederlàànd. Te völle verontreinigingen in’t water duur schaliegasboringen en ààndere onzinnige activiteitn. Ik binne dan ok bange da’w in dat geval wier terugge munt noar de oole maneere van water haaln. Niks gen Vitens mear, want die könt neet leawern. Nee, wie goat wier terugge  noar de eengste poompe. Vandoar dizzen foto van vandage. Dan köw der à vuste un betje an wenn…

Vrogger, nog vuur dat der loopställe warn,  harn de beeste nog heurns, mear rechtevoort zeej der geneene mear met heurns, tenzij het un exotisch exemplaar is. ofwel un boetnlàànder. As ze toen met mekaar stootn, dan knaln ze met de heurns teangn mekaa. In sommige gevaln stottn ze un heurn der vanof en kreangn ze zo’n blooderigen kop. Dat zag ter lekker oet!  Doar hebt ze nò gelukkig gen last mear van, want zie stoot mekaar gewoon met un blootn kop. Könt ze mekaar eens deepe in de oongn kiekn, zonder dat de heurns in de weg zit…

De dakgötte bie het ni’je oole hoes hef wàl wat oonderhoold neurig, want de beumkes greuit er àl in! In dit geval is het gen achterstallig oonderhoold mear vuurstallig oonderhoold umdat dit vuur’n stal lig…

Dizze strip van Toos en Henk (hé, den ken ik) steun vanmorn bie oons in de kràànte. Den wo’k oe neet onthooln as reactie op alle filmpkes op het Gezichsbeukn, ofwel Facebook. Het zal oe mear oawerkomn…

Vanaongd was ter bie het Reggedal in Eanter het zommeraongdconcert van muziekvereninge Irene. Het was een zeer geslaagd concert, vuural toen ze un Doe Maar medley dèèn.
Dan deanke ie bie oezelf dat dit nog neet van die oole muziek is (umda’j zelf nog neet zo oold bint…), mear dat vaalt toch eawn teangn. De muziek van Doe Maar is alwier zo’n kleine dartig joar oold (oet 1982)! Vuur de jeugd van nò is dit bejoarn muziek, meer vuur de bejoarn in het Reggedal was dit nieuwerwetse muziek. Ik deanke dat alleanig de 40 plussers (en 50 plussers) dit waardeern en helemoal oet eur dak gungn…Alhoewel, dat völ ok wàl wier met, een lich skuuveln van de veute en een klein knikje van het heuwd gaf an da’j de muziek kenn en met de gedachen noar vrogger gungn…
Op Eanters Niews köj miene oetgebreidere recensie leazen.

Dit lea der vandage onder’n auto! Grote kààns dat het van un steenmarter is den wier terugge is èkömn en oawernacht hef in’n auto, den op’n oprit steet. At de temperatuur ‘s nachs daalt, zoche un lekkere waarme stea op um te sloapn, en wat kan nog lekkerder wean as de motorkappe (der oonder en neet der op) van un waarmen auto?
Noa inspectie van’n auto koonk gen schaa ontdekkn, mear vuurlopig zet ik un auto ‘s nachs wàl in de garage. Doarbie goa’k eens deepe noadeankn hoe’k dit schattige huisdiertje kanne verdriewn…Suggesties?

Het is zowied, wie könt an de pompoen’n begin’n. Zie zeet er good oet, dus de kommende wekkkn he’w un dieet van pompoen’n. Wie et net zolange duur tot da’w der oranje van oetsloat. Vuur de leefhebbers die ok un waarm harte vuur het koningshoes hebt,  he’k doarumme twee receptn oppeskreawn:

Pittigen pompoenensoep

Wat he’j neurig?
1 pompoene
2 tene knoflook
2 siepeln
1 rooin pepper
3 etleppels zunnebloomnölie
2 tealeppels kerriepoeier
800 ml kippnbouillon (van ne tablette)
4 etleppels creame fraiche (bekertje 125 ml)

Hoe maak ie het?
Snied ‘n pompoene in twee stukke. Haalt er de zöa en de rest van de drëudige  binnkàànte oet, en haalt er met un skaarp mes ok de boetnskölle vanof. Maakt er nò mooie blöks van 2 centimeter van.
Sniet ‘n siepel in kleine stuks (neet göln!) en maakt un knoflook ok heel fien. Un rooin pepper muj in langs duursnie en dan muj der de zöadjes oethaaln. Vervolgens sniej het vruchvleis in kleine stuks. Deank ter umme : Neet met de vingers in de oongn vriewn aj un pepper sniet, want dat kan onmeung zeer doon!
Nò muj de öllie in de panne met un dikkn boam heete maakn. Vervolgens fruut ie de pepper, knoflook, siepeln en de kerriepoeier een kleine 2 minuutn op un middelhoog vèùr. Ie gooit er pompoen’nstukke in en die bak ie ok 2 minuutn. Dan geet ie de bouillon der bie, brengt het an de kok en loat het op un leag vèùr zòn 15 minuutn zachjes kokn. At het zon betje gaar is haal ie de panne van het fornuus. Ie pureert de soep met un staafmixer tot een egaaln brei

Hoe ette ie het?
Ie schept de soep in un komme of in un deepn  teelder. Doarnoa schep ie der 1 etleppel crème fraiche duur hen. Ie könt het serveern met un stukn broene stoete derbie. Reknt der wàl op dat dizze soep onmeunig good vult en daj noa un tweede keer tot an’n haals vol zit…

Waterhooks pompoen’n stoofpotje

Wat he’j neurig?
4 etleppels oliefölie
2 siepels in kwart ringn (dus neet al te fien)
2 teentjes knoflook, in pläks
250 gr weenterwottel, in pläkke
1 rooin paprika, in bölle
500 gr pompoen, in bölle
150 ml krúúnbouillon
100 gr. rozienn
1 theeleppel kaneelpoeier
1 theeleppel gemberpoeier
zoolt en vasgemaaln pepper
1 blik (dose zoas ze in Duutslaand zengnt) witte boon’n of kikkeraarven
grof broene stoete

Hoe maak ie het?
Ie munt de olieföllie allereerstens heete maakn in de panne op het het fornuus. At het heete genog is, dan muj doar siepel- en de knofloofstuks in fruitn. Betje glazig loatn wörn. Doarna knikker ie er de res van de greuntn erin en bak ie ze eawn met.  Ie doet er de krúúnbouillon, kaneelpoeier, rozienn, gemberpoeier, zoolt en pepper bie en ie loat het un 20 minuutn. offedekt, stoawn. Doarna schep ie dur de witte boon’n of kikkeraarven duurhen en loaj ze eawn heete wörn. At alles good heete is, muj ean kiekn of het neet al te dreuge is. Ander dooi dur nog gauw wat extra bouillon duurhen. Pompoenn hebt namelijk de neiging um al het voch op te nemn…

Hoe ette ie het?
Ie schept het in un deepn teelder, lengt er un stukn stoete bie en de moaltied kan beginn.
An un wienadvies begin ik neet, mear volgens mie kan hier zowel witn en rooin wien bie. Ie mangt er natuurlijk ok un gleaske water dur bie dreenkn…

“Kiek es an”, dach ik bie miezelf, ”wat un mooi blauwzwatte kevertjes zit er de elzenblaadjes!”. Een heeln elzenbos zat vol, dus het leak mie ok genne soort den met oettstaarven bedreigd is. Toe’k wier in hoes wasse, he’k dit gauw op’n computer oppezoch. Dat geet rechtevoort makkelijk. Ie typt bie Google “kevers” in en dan kriej plaatjes van alle soortn kevers ter wereld. Dan zeuke ie net zo lange totdaj un exemplaar hebt, wat er op lik. In dit geval blik dat het hier um het elzenhaantje geet. Dat is één van de meest vuurkommende soortn bladkevers in Nederlàànd. Meender mooi is dat ze berucht bint vanwege eure vretzoch an beume, Zie vret, met name bie elzen (mear ok bie weelgen, hazelaars en pöppels), hele blaa weg. Un boom kan’t er dan knap zoer met kriengn. Bint het de kevers neet de blaa opet, dan doot het de larven wà van dizze kevers.  Dubbelop dus.
A’k  de kommende tied die mooie kevers wier zee in de elzen dan zak ze der mooi oetschudn. Zie könt het schudn…

Oonderweg noar Hengel kwamn wie dizzen reangboog teangn. Het lik wà offe oons de weg wis: “Hier muj hen”. Wà makkelijk, want ie hebt un tom-tom neet mear neurig. Doar is één noadeel: Ie hebt er niks an in’n duuster…