Vandage weining tekst, want ik har ok weinig foto um te toonn.
30 juli 2016 – Un làànk en good leawn
Vandage bi’k met de zönne noarn film èwes: Star Trek Beyond. Un film vuur de leefhebbers van Start Trek. Gen Star Wars, want aj die twee films met mekaar verwisseld kriej dikke ruzie met de fans.
Star Trek geet oawer het ruimteschip de Enterprise dat op zeuk is noar ni’je werelden, noar plaatsen woer nog nooit ene earder is èwes of zoas dit in het intro zengt “to boldly go where no man has gone before”.
De fans van Star Trek neumt ze “Trekkies”. En die hebt eur eengste gebroekn, zoas de Vulcaanse groet, de’w hier vuur doot. Dat gebroek is offekekn van Mr. Spock, den un heeln bekeandn is in’n film. Spock wörn èpsöld duur Leonard Nemoy. He is un soort van een cultheld èwörn, zoaj wà könt zeen in dizze ofleavering van The Big Bang Theory. Muj mear kiekn, völle wille!
29 juli 2016 – En woer geet de reize hen?
Dreemaol roààn woer de reize van ankommen moandag hen geet…
28 juli 2016 – Het reangt as het dösket
Doar kwam vanoangd wier in korte tied heel wat water noar beneen. Het reangn as het dösken. Volgens mie koomp dizze zegswieze van het dösken van rogge of. Doar zeej dan ok de roggekeurn in in grootn stroom in’n bak valln. Zo was’ t vanoangd ok met dizze buuie. ‘n Reangn dösken noar beneen. De dakgötn leupn compleet oawer.
27 juli 2016 – Het is gel en ie könt’t ettn
Wie hebt vanwekke un ni’jn primeur: un gelle courgette oet’n eengsen hof. Den zal toch onmeunig lekker smaakn. Ie wordt gewoon blie van aj em zeet. En dat is àl de helfte van de smaaksensatie!
Zal mie beni’jn woenear ze komt met gelle aardbein…
26 juli 2016 – Bloomn
Dizzen foto van oonder andere un Weeln Wortel a.k.a. de Wilde Peen he’k in Photoshop lech bewaarkt um toch nog un aantrekkelijk resultoat te kriengn. Het vaalt mie nog alleszins met, ofwel geenszins teangn.
Ps. Wat dacht van un nieuw Suske en Wiske book: Suske en Wiske en un’n Weeln Wortel..
27 juli 2016 – Catweazle
Ken ie Catweazle nog? Dat was un populaire wichterserie in de joarn 70. A’w no soms nog zo’n type persoon teangnkomt (beurdje, lange heure, enigzins alternatief), dan neumt wie em al gauw Catweazle. Iedereen snapt dan woer wie het oawer hebt. Zonne serie dreag ie oe hele leawn met oe met.
Catweazle har ok un pad, den te Mr Touchwood neumn. Vanoangnd kwam ik in het grös un kikker teangn den mie hieran dea deankn. Den he’k dus heel gauw op’n foto èzet, vuurdatte mie wegsprung.
24 juli 2016 – Wie wilt neet op’n foto
Vandage he’k Maarten, mien schoonzuster en de vrouwe (wat koomp dat toch wier onmeunig charmant oawer) naor eur vakaansiebestemming in Nieuwveen èbrach. Dit is un vakaansie den georganiseerd wordt duur stichting Wigwam. Muj mear eawn via de link noaleazen wat dit precies inhoold, want dan hoow ik het hier neet allemoal op te skriewn.
En natuurlijk mut er dan un foto wörn èmaakt. Mear dach ie dat ze op’n foto wolln? Alle dree kiekt ze un ààndere kàànte op. Volgende keer toch mear iets vreendelijker vroangn um noar’n vogel te kiekn…
23 juli 2016 – It’s dahlia-time
Het is ter wier tied vuur! Dit tot licht afgrijzen van miene vrouwe, mear ja, den is nò toch eawn op vakaansie. Dus bij deze, un earsen foto van un dahlia! Kiek es an, dat zöt ter toch mooi oet!
22 juli 2016 – Onbekend
Dizze schermbloemigen zag ik vandaage in’n baarm. Het is gen fluitekruid, mear ik weat neet wat het wàl is. Vuural de oetgebleuide bloomn kriegnt un mooin apartn vorm.
