Maand: april 2017

Un zeungentwintigsen april is rechtervoort Koningsdag. Dat zit er bie mie nog neet good innestampt.  Un koninginnedag op 3o april veen ik nog steeds logischer. En a’k nó van vuurn oorlog wasse, zo’k zengn dat 31 augustus un koninnnedag was (un verjeurdag van de oole koninginne ofwel Wilhelmina). 
Mear genog hieroawer, op dizzen Koningsdag b’in ik op miene eengste maneere met oranje  beazig èwes. Behalve televisie kiekn he’k miene pompoenplantjes verplàànt noa gröttere pötte. Doar hop ik dan in het noajoar de oranje vruchen van te plukkn. Kiek, en zo hool ik het hele joar un oranjegeveul…

De buurn iets wiederop bint àl zo’n 40 jaor bie mekaar en doarum hoolt ze un feesje. Dat dooj dan soms. De buurte is ter aaltied wàl blie met (met het feestje dus).
As buurte he’w doarumme de boele versiert. Dat doow hier nog op zien traditioneels. De keals maakt un mooin greunn boangn en de vroale maakt de reuskes. Dat steet garant vuur völle wille en fleenk ouwehoern met mekaar.
Het meuiste was un foto den van het bruidspaar wörn èmaakt. Den was vuur het plaatselijke ni’js. De oawerbuurvrouwe most er ok nog eawn bie op. Alleanig had  ze neet in de gaatn dat er juust op dat moment un foto wörn èmaakt. Dooj net eawn gek, en dan wordt er un foto èmaakt zodat dit vuur aaltied vuur het noageslachte bewaard blif. Dat bint toch wàl de zegeningen van de moderne tied met eur media…

Bie oole buurn (Kempe Melkvee) harn ze vandage de Albert Heijn Open Boerderijdagen. Jan en alleman kon vandage eens bekiekn woer de melk van AH nou feitelijks vandan koomp. Behalve un rondleiding duurn stal en un  betje beeste bekiekn warn der ok trekkers en àànder machinewaark te zeen. Dat dear mie wier good as oold ofgestudeerd landbouwtechneut. Eén van de opmaarkelijkse nieuwsfeitjes dee’k zagge was dat de Fendt trekkers un ni’je kluur greun hebt. Een meer frissere kluur greun. Het oole greun was te saai en voldeer kloarbliekelijk neet mear. Dat was zò 2016…. Ie munt innoveern en verààndern, Change is good zoas de Amerikaan’n zengt. Doarumme disse ni’je kluur. Of ze der nò ok better van goat presteern wear ik neet. Wat mie wàl opvöl dat de kluure heel völle op dat van un John Deere geet liekn. Doar wo’j ok àl neet blie van…
Loak het mear bie dizzen ooln slogan van Cormick hooln: If it aint red, keep it in the shed

Op’n Earsen Poasdag he’w oons eengste poasveur in’n bràànd èstökn. Un oole traditie he’w in ere èheuln, zoonder tegemoot te komn an de teagnwoordige tiedsgeest. Dus gen draank en ok gen muziek. Ok gen kollosaal groot veur met völle leu der bie. Het was was un mooi heanig vuurnkn met alleanig de vrouwe en mie (en nè greape met wat pieteröllie). En het brààndn ok nog onmeunig good. Wat wi’j nog mear? Un earsen foto gef de sfeer good wier.