Joa, joa, noa twee wekke wier terugge in Apeldoorn. En wat blik? Alles steet er nog. Niks is veràànderd. De Belastingdienst dreeit gewoon duur in de vakaansie, want het geeld mut bliewn binnkommn…
30 juli 2017 – Schutterskoning Waterhook
Wat dooj op un làànderigen (langweilig) zundagmiddag op het Twentse plattelàànd? Juust, dan goaj met’n weendbuks scheetn. Typisch iets vuur de locale rednecks… Dus wieleu vanmiddag met un weendbuks op een leag blikn scheetn. Den t’em eerste raakn wörn de schutterskoning van’n Waterhook.
Bie dizze is de zönne dus un eersten schutterkoning van’n Waterhook…
29 juli 2017 – Onbespöttn en biologisch dynamisch
Zeet es an, wat un mooie tomaatn. Zo fris en fluurig, zee konn wàl oet un eengsten tuin komn. En wat smaakt ze lekker! Doar zit zekers un onbespötn en biologisch dynamisch smaakje an! Het is da’w der gen veeld van vol van hebt want aanders zolln de inkopers van de Emté en de Albert Heijn hier de duure platloopn. Nò möw ze zelf opetn. De vrouwe veend dat genne straffe. En ikke? Ik geew ze ze gearne duur want ik bin der neet zo gek op.
27 juli 2017 – Ongemakkelijke hoolding
Op de weg noar hoes an kwamn wieleu langs Porta Westfalica, ofwel de deure noar Westfalen. Bie dizzen duurgaank tussen twee baargen, woer de Weser zich in de Noord-Duutse laagvlakte “stort”, hef keizer Wilhelm un Earsen zich indertied een groot standbeeld loatn bouwn. Dat mow natuurlijk eawn bekiekn. Wat oons opväl was de enigzins ongemakkelijke hoolding van’n Keizer, zo met un aarm gestrekt vuuroet. Wie introduceern dit toch nog meer in de Duutse geschiedenis? Is dit hier van offekekn?
26 juli 2017 – Vergoan’n glorie
In Duutslàànd he’j nog völle pleatskes die met “Bad” begint. Dat hoold in dat er dan medicinale bronn bint woer leu zich in könt baden. Baat het niet, dan schaadt het niet, zölt ze wàl deankn. Vrooger wörn hier völle gebroek van ėmaakt mear rechtervoort is het een oflopende zaak: der goat neet völle jonge leu mear hen en wa’j zeet zind oole hotels en oolderwetse bloomn. Vergoan’n glorie.
Vandage wa’w in Bad Pyrmont, van ooldsher een bekeand kuuroord. Wat oons opvöl was het hoge griesgehalte in de stroate ofwel op de boulevard. Völle oole leu en weing jonge leu (en dan reknt wie oonszelf nog neet met…). Alles leup heel heanig met de rollator of wààndelstok vuuroet. Het enige leawndige tafereel was un vol terras met bejoarn die luidkeels metzungn met un schlagerzangeres Het gung der aardig vanof. Zol dit het resultaat wean van het medicinale bronwater? Of was het de alcohol? Al met al, zie harn wàl plezeer met mekaar, en doar geet het oeteandelijk ok umme…
25 juli 2017 – Dauerregen
Het was vandage wier good nat op oons vakaansieadres in Duutslàànd. Un heeln dag reangn of zoas de Duutsers zengt “Dauerregen”. Hieroonder Eej un foto van Hameln in’n reangn. Alle rottn hebt duurn reangn Hameln al verloatn.
24 juli 2017 – Paderborn
Vandage wa’w in Paderborn. Doar wolln wie aaltied nog un keer hen, en aw nò toch in de buurte bint… Met dit reangachtige weer köj ààns ok neet zo völle en goaj neet in’n bos loopn. Wie hebt un dom bezoch, een van de weinige gebouwn den’n oorlog hef duurstoan. Oonderstàànden foto is van un hekwaark in’n dom. Mooi verdwijnpunt köj der van maakn.
23 juli 2017 – Corvey
Vandage wa’w in Corvey bie Höxter. Doar steet un oold klooster wat op de wereldcultuur erfgoederen-lieste van de Unesco steet. Dus dat mo’w toch eawn bekiekn.
22 juli 2017 – Eanters in Detmold
Bie “der Hermann” in Detmold kwamn wie nog een stukn Eanters “Dat makt ons nöms noh” teangn op un oole ansichtkaarte oet begin 1900. Nooit èweatn dat het Eanters zoveer in Duutsland was duuredrungn. Iets vuur Gerrit Kraa um te oonderzeukn? 🙂 
21 juli 2017 – Leicht feuchtes Beton
Eén van de meendere dinge van vekàànsie in Duutslaand of Oostenriek is de stoete. Den lig nog wàl zwoar op de mage. Ik weet neet wat ze derin stopt, mear vuurdaj het weet verbuur ie oe bie de bakker al an één volkoorn stuutje. Volgens mie deankt ze bie “volkoren” dat er zo völle meugelijk keurne in mut wörn èstopt. Behalve dat het zwoar op de mage lig is de smaakbeleawnis ok neet je van het. Het dut deankn an “leicht feuchtes beton” zoas iemand dat heel doeltreffend umschreef. Zolange het nog mear neet gewapend beton is…
