28 oktober 2017 – Het gat van Eanter

Ziehier het resultoat van het al joarn duurnde gedoo um een middenplein! Het ene gat wis noar het ààndere gat. Wat un troosteloze boele…
Een middenplein mos Eanter hemn, want dat was good vuur de middenstand, veunn de projectontwikkelaars. Dat ze doar eur eengste knippe met bedooln hà de gemeente Wierdn neet echt in de gaatn. Al met al kwam der dus een plan vuur het ‘noodzakelijke’ middenplein. De heele boele wörn èsloopt en de eerste gebouwn kwam der op te stoan. Dat zag ter goed oet. Totdat ze de boele monn verhuurn, want dat gung neet zo vlot. Van de eerste fase (het plan hà twee fases) stoat nog steeds commerciele ruumtes te huur. Doarumme könt ze nog neet met de tweede fase beginn. En denne kriengt ze natuurlijk nooit vol…Gevolg is dat er al un tiedje een groot gat in het “kloppende” hart van Eanter lig, compleet met stoefzaand en àandern pröttel. Joa, dat hef de gemeente Wierdn wie good annepakt…Gen middenplein mear un middengat hew nò!

28 oktober 2017

27 oktober 2017 – Mooie kluurn

Ik wasse vandage eawn op bezeuk bie un vogelkweker, en keal, keal, wat hà den mooie kluurige vogels. Het warn dan ok de Australische prachtveenkn. Een naam zeg het àl, prachtveenkn. In alle kluurn van wit tot pears.  De heele schuure stön vol. Het was zienen hobby un veenkn te kweakn, want fokkn dat dooj alleanig bie groot vee…

27 oktober 2017 a
27 oktober 2017 b
27 oktober 2017 c

26 oktober 2017 – Vlarista

Kiek, de nieuwe trend: de vlarista. De leu bint al lange oettekekn op de barista’s met eur trendy beurdjes en knotkes op’t heuwd en woej koffie könt kriengn in alle kluurn en smaakn.
Terugge noar de oorsprong, dat möw! En dat begeent bie de oer-hollandsche toet, ofwel de unieke vla-en-yoghurt-combinatie. Den köj in alle mooie vormen mengn. En het bekt en smaakt ok nog lekker. Last but not least: ie helpt er de boern ok nog met…Wat wij nog mear?

IMG_20171025_184120

25 oktober 2017 – Bloomn

De ofgeloopn dage un aantal föskes (ofwel boeketten) bloomn èkreang. Wat blik: wie bint 25 joar ètrouwd. Net toevallig toe’w in Valencia warn. Hoe toevallig toch wier…
Oons hoes is nò helemoal in herfstsferen. De blaader valt gestaag (en wieleu ok aw te lange stoat).

IMG_20171025_212119

24 oktober 2017 – Op hoes an

An al het mooie koomp un einde, dus vandage morn wie wier op hoes an. Wie göngn van de 25 groad met zunne terugge noar de 13 groad met bewolking. Terugge noar het laand van mist en mest. Weg van de paella de tapas en terug naar de stoete en stampot…

24 oktober 2017 a

24 oktober 2017 b

23 oktober 2017 – Fiat Multipla

Wie warn vandage in het Oceangrafic van Valencia, één van grötste aquariums (of aquaria?) van Europa. En doar zeej natuurlijk heel völle vis, kwalln, etc.…
Ik heb ooit èheurd dat un Fiat Multipla un lilluksten auto is den ooi is èmaakt. Hè wörn zelfs mooi duur ziene lillukheid. Vandage ha’k hetzelfde met un dolfijn, un zogenaamden beluga ofwel de witte dolfijn. Dit is vuur mie de Multipla onder de dolfijnen, zo lilluk.

 23 oktober 2017 e  23 oktober 2017 a

23 oktober 2017 b

Gelukkig he’w ok nog un betje könn roondfietsen. Wie kwamn toen dizze prachtige gebouwn teangn.

23 oktober 2017 c

23 oktober 2017 d

22 oktober 2017 – Een dagje naar het strand

Vandage bi’w noar’t strand èwes. Het was zulk mooi weer, da’w dat neet konn oawersloan. Vuural umdat in Nederland zò slech weer is met völle reangn. Ie munt toch iets hemn woe’j ze de oongn met könt oetstekn, en wat is mooier dan een foto met un groot leag strand, blauwe loch en golvendr zee. Dus vandoar…

IMG_20171022_155210IMG_20171022_150151IMG_20171022_153311IMG_20171022_154408

21 oktober 2017 – Un stukn keaze met dreuge wos

Vandage goa’w Valencia ontdekkn. As eerste bi’w doarumme noar de Mercat Central ègoan, nè grote oawerdekte maarkt, woe’j alles op het gebied van vaske en iets minder vaske voedingsmiddeln könt kriengn. D’rek toe’w de duure lös dean, kow àl roekn dat Valencia an de zee lig. Wat un dààmpn van vis kwamn oons tegemeute. Wie kreengn der noo neet derekt zin an…Mear alles lea der, van eenkvisken tot an leawndige kreaften. Iets veerderop bie de ofdeling Vleis höngn de Iberico scheenkn an het plafond. Genog vuur de “vleeschminnende mens” . Het meuiste was dat er hier ok un Twents borrelhapje kon wörn èkoch, namelijk un stukn keaze met dreuge wos. Vermoedelijk is dit duur Spaanse soldoatn die in Twente warn èlegerd  ten tijde van’n 80-jeurigen oorlog met ėnömn noar hoes (Spanje). Het borrelhapje is un betje verbasterd umdat ze hier neet die fijne dreuge wos hebt zoas wie die hebt, mear och, ie munt het ok neet te nauw bekiekn. Het geet um het grote plaatje. En zo zee’j dus oaweral ter wereld Twentse invloeden terugge. Woer un kleine regio (zoonder vliegveld) toch groot in kan wean…

IMG_20171021_102817IMG_20171021_101716IMG_20171021_102844

20 oktober 2017 – Vleengn

Un trekker met’n carvan van gistern he’w mear loatn stoan in Brussel, want het is oons te lange veurn (met ne trekker veur ie, met ne auto jaag ie) noar Spanje. Wie goar doarumme vearder met het vliegtuig. Eens kiekn of het doar angenamer weer is as hier.

IMG_20171020_093038