8 november 2017 – Un droonk

Ik mosse gistern noarn kaakchirug um un onsteking in miene boangkake weg te loatn haaln. De hele operatie verleup voorspoedig en noar un uurnkn was alles gepiept. Het enigie lastige is da’k de eerste dage un betje un opgezwöln moond hebbe en da’k medicien’n teangn de zeerte murre slikkn. Dat leste nem ik duur middel van un droonk. Dat döt mie deankn an vrogger a’j de beeste un droonk mon’n geawm teangn bievuurbeeld melkzeekte. Dat deej met un glazen fleske woer un poeier met water in was oppelöst. De koo nöm ie in un houdgreep, ie trökkn zien’n  bek omhoge,  en dan hup, de fleske derin, tusken de tàànde duur, in’n bek. En dan koo mear sloekn, net zo lange as de fleske leug was.
Gelukkig kan ik het nò gewoon oet un glas dreenkn… 

8 november 2017

6 november 2017 – Dahlia’s

Toe’k vanmiddag duur Eanter fietsen völ mie ooge (hoe kan dat toch) op dizzen hof met dahlia’s. Volop in’n bleui, en dat nog wàl in november. Dus un foto vuur mien’n blog weard….

6 november 2017

4 november 2017 – Boern in Oaweriessel

Vanmiddag bi’w in meseumboerderieje Erve Hofmans in Heldern noar un tentoonstelling oawer de veraanderingn in de Oaweriesselse landbouw èwes. Un oonderwaarp dat mie nog wà naa trek.
Het resultaat völl oons un betje teangn. Interessante filmpjes, mear wieter weinig te zeen. Te völle ofleiding duur beeld- en geluudanimaties die tegeliekertied wörn offespöld. Kortom, dit kon wà better, umdat dit ok bedoeld is vuur de oole garde den dit allemoal hef mettemaakt.

4 november 2017 b

4 november 2017 a

3 november 2017 – Het haasje

Dizzen haazen was het haasje vanaongd. Hee was vanzelf bie de dure goan zittn, mear eawn later leare doar ok al. Kloarbliekelijk wasse neet helemoal terechte… Enfin, oeteandelijk heffe het leudje èleg en wasse figuurlijk het haasje.

3 november 2017

2 november 2017 – Roetnlappers

Ziehier de roetnlappers van de Belastingdienst! Zie waarkt oonder hoge belasting bie de Belasting um het meugelijk te maakn dat de ambtenaarn tusken alle drokte duur van de belastingpapiern ok nog eawn met un heldere blijk noar boetn könt kiekn.

2 november 2017