Maand: februari 2020

• Op dizzen schrikkeldag bi’w drok bezig èwest met het plààntn van un meideurnheage bie oons um de weide hen (de boomgaard , zo aj dat least in Landleven ).  Het was knooin, marteln en worseln mear ‘s middaangs um vief uur hadn de vrouwe en ik alles in de groond. Wie kreangn oonderwiel nog wàl un fikse reangnbuuie op de hoed  mear den mog de pret neet drukn. Un meideurn mos de groond in!
  Un meideurnheage heurt bie het plattelaand (völle mear er as al die beukenheangn die’j rechtervoort zeet). Vrooger wörn úm’n hof vake un heage van meideurn èplaant, zodat de kippn, katn en heunde neet in’n hof konn komn. De schaarpe stekkels heuln eur wàl teangn. En doornöast kon der de waske ok mooi oppedreungd wörn wan den weain neet weg vanwege alle stekkels.
  Ik zalle es kiekn hoe dat hier geet. Mogge ie mie ooit zeen in kleare met völle gäter, dan wee’j dat dat neet oet zeunigheid is, mear dat ze bint èdreungnd op oonze mooie meideurnheage…

Het weer was vandage wier net un wichtergätje: de ene keer dreuge, de aandere keer nat.

Vandage he’k dizzen ooln wilg (Salix antiquis) eanw good te pakkn èhad. Alle lottn van het ofgeloopn jaor he’k ter vanof èhaald met de zage en sneuischeare. He hef nò wier un biezeunder glad köpke, ofwàl un gedekt model. Tenminste zo veuln dat vrogger ok a’j van de kapper thoes kwamn. Bie de kapper wörn èzeg un gedekt model, mear a’j thoes kwamn leek het a’j der gen hoar mear op harn zittn…

Ken ie dizzen nog? “Oonze Dennis zit op tennis”…(un zegswieze um te toon’n da’j nog wàl greuts vuur’t gat bint)
Nou, mear vandaag zat oonze Dennis neet op tennis, mear hee was nog opgebloazener beazig. Hee teistern het goudgele strand van Noordwijk met ziene weendvlaang. Het was neet plezeerig um doar te loopn. Reangn, weend en zaand teistern oonze gezichen. We harn genne peeling mear neurig um der twintig  joar jonger oet te zeen.  Het zaand en de weend zorgen doar wàl vuur.
Wie bint der letterlijk oeteweait.

Zoas ie op oonderstoanden foto könt zeen, geet het leawn gewoon duur. Vuurig joar he’w dizzen boom ummezaangd umdatte kets verrot was van binn’n. Dit joar greuit àl heel mooie paddnsteule op. Het leawn geet gewoon duur, alleanig in un aanderen vorm (wà wier heel deepzinnig vandage…)