Maand: oktober 2020

Joa, joa, het kan wier! Dat wordt wier  smikkeln en smulln, hatsekidee!  De pompoenn he’k van’t laand èhaald en wie et vandage vuur de eerste keer van de oogst van 2020. En wat vuur un oogst! Nè hele maande vol met pompoenn! Köj oe vuursteln da’k ter noa een paar moand der genog van hebbe?

 

Vanmiddag mo’k wat sukelaatjes wegbrengn noar de eldere leu oet de kaarke en in een vlaag van sportiviteit he’k de fietse mear èpakt. Dat doo’k neet zo vake, mear vandage leek het mie wàl un good moment. Un betje frisse loch zol mie wàl good doon. Het gung helemoal good totdat het begun te reangn. Toen wörn het plezeer al gauw meender. Mear zoas het sprekwoord zeg ”Het geet neet vearder as het vel”, ofwàl ie munt neet piepn en noar fleenk duurtrappn wa’k dan ok net vuur de grote buuie in thoes.  Oonderweg he’k nog een paar foto’s èmaakt van de Bekke of zoas nò zengt de Regge. Het was vrooger un rechen steenksloot, mear he is in de ofgeloopn joarn oarig schoner èwönn en kroonkelt è volop duur het Tweantse landschap.

Het is dit joar wier un bes eikeljoar. De beume hangt er vol met! En al dat spul vaalt ok nog op de groond dus ok doar gen gebrek an eikels. Ok in de politiek  köj dat zeen. Ik harre hopt dat “overdaad schaadt”, mear in dit geval geet het neet op…

Vanage he’w de ni’je waskeliene officieel èopend met het ophangn van oonzen dekberrehoes. Ik heb ter nog gen good droad anzitn mear dizze eerste keer moch het wat lösser. Dit was de pilot ofwel de proof of concept um in projecttermen te sprekn. De waskeliene hef alles good duurstoan want de pöale stoat nog keersrech in de groond (dat moch ok wàl met al den beton in de groond). De dekkberrehoes ok, want den zit inmiddels wier um oons dekberre….