Maand: mei 2021

Vandage hew as un stel actieve vieftig plussers het wessen van Zeeuws-Vlaanderen en België onveilig emaakt met de electrische fietse. Wie bint begönn in Nieuwvliet en bint vandoar via Cadzand en het Zwin duurefietst noar Knokke in België. Doarnoa noar Sluis in Nederland woer wieleu un lichte lunch hebt enuttigd (stoete) in un plaatselijk restaurant. Het hele stadje is innericht op toeristen (vuural Belgen) en ie strukelt dan ok oawer de terrasjes. Vervolgens bi’w wier op de fietse sprungn en bi’w efietst noar Aardenburg, het ooldste stadje van Zeelaand. Dit is un oold Hanzestadje dat vrogger heel wat belangrieker en grötter was dan nò. Helaas wörn het duur de concurrentie oet Gent à in 1383 met de groond gelieke maakt. Die Belgen köj ok neet vertrouwn… Ok in de tachtigjarige oorlog is ter fleenk evöchen. Doarnoa wörn het rustig en dommeln het stadje veerder de teangnwoordige tied in. Alleanig in Tween Wereldoorlog is ter völle kapoteschötn, net zoas in de res van Zeeuws-Vlaanderen. Noar Aardenburg bi’w un gloepensen eane wier teruggefietst noar Nieuwvliet. Het was aarg makkelijk daẃ trapondersteuning harn, vuural umdaw de hele weg teangnweend harn (dat he’k aaltied op de fietse).
Wat mie vuural opväl is dat er zovölle geschiedenis is in Zeeuws-Vlaanderen. Zie hebt hier heel völle mettemaakt in de Tachtigjarige Oorlog. Hier lean namelijk de linies van de Noordelijke Nederlanden (Staatsen) en de Zuidelijke Nederlanden (Spaansen). Dus hier wörn fleenk evöchen, wörn diekn duurestökn um het laand oonder water te loatn loopn, wörn stukke laand innepolderd, wörn forten ebouwd, worn steden veroverd en goat zo mear duur. Doar was hier ok völle mear welvaart en handel (Antwerpen, Brugge, Gent, Sluis). Dan was het bie oons in Twente mear un heanig spul tusken het bos en moeras…

• 

Dizze keer gennen foto van ne bloome, un hof of ne koo. Nee, wie sind vandage noar het goudgele strand van Cadzand ėwes en hebt doar de zilte zeeloch oppesneuwn. Un totaal aandere wereld dus. En doarumme ok dizzen foto.

Wie bint vandage vertrökn vuur een hééééél laank weekend op het plattelaand van Waterlandkerkje. Dat pleatske lig in Zeeuws-Vlaanderen, net zoas Plakkebord, Stroopuit, Boerenmagazijn, Boerengat en Boerenhol. Dat bint wà heel biezeundere plaatsnamen. Apat! Gelukkig kom ik mear oet Rectum…

Umda’k neet wolle wachen op de oetkomst van ‘Boon’n 2 0’ he’k vandage de boonn mear gewoo in de volle groond estopt. Het wordt de kommende dage mooi zunnig en dreug wear, dus de boonn könt net zo good direct de groond in. Hoo’k ze later ok neet mear te verpotn. En de Boon’n 2.0? Die könt dan direct duu noar un GFT-bak…

Heel vuurzichtig begint bie oons de earste klaprozen te bleuin. Zol dit het begin wean van het mooie vuurjoarswea? Ik hoppe het, want tookn wekke he’w un wekke vakaansie. Un betje zunne zol heel mooi wean! Dan wo’w misskien net zo oranje as de klaprozen…

Het is vandage “Wat deer ik eerder op dizzen doatum”-woensdag. In het Engels zengt ze dan “Throwback Thursday”. mear ik veene dat mienen “Wat deer ik eerder op dizzen doatum”-woensdag gewoon völle lekkerder bekt. Vandage goaw terugge noar 26 mei 2015, àwier zes joar geleane.  Ik har toe dizze peenke bie oons in de weide op’n foto ezet. Ik schreave der bie datte hellig was, mear a’j good kiekt isse gewoon in volle aanbidding vuur den boomstroonk. He geet er zelfs vuur duur de kneene. As peenke kom ie natuurlijk ok neet zovölle boomstroonkn teangn in de weide, gen woonder da’j der dan bie stille stoat…As boer, hop ik ok neet…
 

Seends un paar dage he’w wier las van’n hoeshazen. He knabbelt un betje an het grös in’n tuin (da’k trouwens neurig muure meain), huppelt hen en wier en kik oondertusken met schune oongn noar de frisse blaadjes van’n meideurn. ‘Zie kiekt mie an’, dech’e bie zichzelf, ‘loa’k het eens probeern!’. At het zovea koomp, deank ik da’k wat goa probeern met’n weendbuks…

Ik heb vandage de boon’n vuur de tweede keer epot. De eerste kear was het niks. Zie kwamn vuur genne milimeter op, ondaanks bemoedigende pröatjes van mie (je kunt het!). Dus he’k ze mear in’n GFT-bak eknikkerd en bi’k vandage met frisse moed vuur de tweede keer begunn. Dizze kear mea iets meender deepe potn, zodat ze ok iets earder könt zeen hoe mooi het boetn is…

Vanmiddag he’w un heel stukke eleupn in de buurte van’n Eelerbaarg achter Heldern. Wie harn zo oetedach um de rooie route te loopn (doar warn meerdere routes) , want den was ongeveer 5 kilometer en nog good te doon vuur oons (stel van middelbare leeftijd). Helaas gung het noa de eerste honderd meter à verkeerd, want doarnoa zaggen wiele gen rood pielke mear um te volgen. Het resultaat was un mooie wandeltocht op eengn inzicht, van 8 kilometer duurn bos en duur’t veeld. Zo kwamn wie duur de boerschop ‘De Kathuizen’  woer’k nog nooit van harre eheurd (foto 1), hebt wie het Pieterpad vuur honderd meter evolgd, zoda’k dat ok wier van de emmerlieste (bucketlist) kanne ofstreepn (foto 2), zaggen un heel mooi greun bos in vieftig teentn greun (foto 3), kwamn wie un dooie beuk teangn den vol zat met de echte tonderzwamme (foto 4) en as läste zaggen wie veugelhuuskes vuur klooke veugelkes die könt leazen. (foto 5). Kortom un geslaangden middag!

Dit pöalke steet eenzaam en verleurn in’n baarm langs un Eversdiek. Ie kiekt er meestal oawerhen, mear het is feitelijks een heel belangriek pöalke. Het gef an dat hier nè braandkraan’n (of is het braandkrane?) in de groond zit. Vandoar de letter BK op het pöalke. Ik hoppe alleanig wà dat, at dizzen ooit zol wörn gebroekt, de braandweer haansken anhef, want ie haalt oene haande lilluk lös an de brummelstruuke den ter umhen greuit.