19 juni 2022 – De grote kaardebol

Hieroonder zee’j un foto van de grote kaardebol. Ne grote distelachtige plaante met opvallende grote bloomnköppe. Ik heb het eens noa èzoch op’t internet en het blik dat dizze plaante vrogger wörn gebroekt in de lakenindustrie. De bloomnköppe (kaardeboln) wörn in un hooltn hoolder èplaatst woermet het wollenlaakn wörn opperuwd. Late gebuurn dat met machienn woerbie de kaardeboln op staaln penn wörn ereangn. Doar wörn in Fraankriek honderden beunders met kaardeboln verbouwd vuur de textielindustrie. Mear an alles koomp un eane en dus ok an het gebroek van kaardeboln in de textielindustrie. Doar wordt gennen eankeln beunder meer verbouwd want er bint bettere maneern um de stof op te ruwn. Het enige wa’j nò nog könt doon is un paar keer fleenk met zonnen kaardebol oawer un jökkebult schoern at ze oe hebt èstökn. Dan vernem ie gen jökke mear…

18 juni 2022 – Het hekke van de weide van’n Deks

Met oons dagelijkse rondje loopn komt wie ok vake langs de weide van’n Deks. Dat is un weide woer’n Deks oet Eanter ziene schöape hef loopn. ‘n Deks is un gepensioneerdn vri’jgezel den aaltied knap drok met ziene schöape is. Ie zeet em dan ok vaake fietsen, op weg noar de weide met de schöape.
De leste tied zaggen wie gen schöape meer in de weide. Het grös was wàl netjes èmeaid en in baaln edoan, mear de schöape zaggen wie neet meer. Un Deks zaggen wie ok neet mear fietsen. Wie vreungn oons wà of wat er met de schöape was gebuurt (allemoal verkoch?) mear dachen neet vearder. Un Deks zol ongetwiefeld wà wier met ziene schöape teruggekomn. Vanaongd op de buurbbq heurn wie dat ‘n Deks un paar wekke geleane oet de tied is ekömn. Doar schrikke ie van. Wie harn in de kraante un rouwdadvertentie ezeen van Gerrit Koenderink, mear der nooit bie stille stoan dat dit ‘n Deks was.
Dus bie de weide van’n Deks zee’j genne fietse mear teangn het hekke stoan. Ie zölt ok gen schöape mear zeen . Het hekke blif dichte en de weide lëug…

Ps. En elke keer a’w het oawer’n Deks hadn maakn wie ok grappn en grolln oawer zienn naamgenoot met de hese stemme oet de serie Dynasty van de joarn 80 (Dex Dexter). Den is trouwens ok à oet de tied…

17 juni 2022 – Natte veute

Vandage he’k opni’js de stökkeboon’n èpot. De eerste keer warn ze mie kets verrot duur’n reangn. Boon’n hoolt neet van koole en natte veute, zoas ze dat zengt. Dus vanaongd he’k wier un ni’je poging edoan. Vuur de zekerheid he’k ter wat meer in de groond èstopt dan neurig is, zoda’k un gröttere kaans hebbe da’t er wat opkomt. En met die tropische temperatuurn van morn, munt ze zeker de groond oetscheetn! Gen koole en natte veute mear mear warme veute. Zolang het mear gen zweetplakkers bint….

6 juni 2021 – D-day, TP-day en RL-day

Het is vandage D-day. Achenzeungtig joar geleane begun de invasie in Normandië duur de Gealieerden. De D steet vuur Decision, umdat hier het keerpunt van’n oorlog in Europa lea.
Het is vandage ok TP-day. Dit sprekt vuur zichzelf op’n Tween Peenksterdag :-). Eagenlijk is het dubbelop mear het bekt wà lekker.
As leste ha’w vandage ok RL-day ofwà Roetn Lapn day. Un paar keer per joar doo’w saamn de grote roetn lapn Het is un heel geknooi umda’w dit met behulp van’n grootn lädder munt doon. Groote roetn liekt mooi, mear zoas Johan Cruijff zea: Elk voordeel hep z’n nadeel… en dat is dan vuural met het roetn lapn.
Mear het is allemoal good egoan, de roetn bint allemoal streeploos elapt en wie könt dan ok wier met un heldere blik noar boetn kiekn!

4 juni 2022 – Ontgreun’n

Vandage he’k mie hellig emaakt op het grös en onkroed in de stroate. Het wordt steeds meer en a’k neet oppasse he’w straks meer grös en onkroad as steender in de stroate. Dus vandage he’k un begin èmaakt met het ontgreun’n van de stroate. Doar kwam gen draank of andere zaakn bie te passe zoas bie het ontgreun’n van studeantn. Het enige wa’k neurig harre, was un voongkrabber. Alleanig noa afloop kwam der wà wier draank in’t spel, want van al dat ontgreun’n krie’j natuurlijk völle dös. En dan smaakt un pilsje op zoaterdagmiddag wà heel lekker…

3 juni 2022 – De buurvrouwn

Ha’k gistern de buurmeakes op’n foto èzet, vandage is het de buurte an buurvrouwn. Iets un aandere mear bettere kluur, mear ok à net zò ni’jsgierig as de buurmeakes van gistern. En lachen? Hoo mear…

Ps. Dit liekt mie staarkn, ok wier zo dialectwoord wa’t weinig wordt gebroekt. Rechtervoort gebroekt de leu meer het woord “Vearzen” (vaarzen) vuur eerstekalfsbeeste.

2 juni 2022 – De buurmeakes

De buurmeakes bint er wier! Heel ni’jsgierig kiekt ze wat den raarn keal met dat zwatte deuske in de haande, nò wier döt. Ech lachend (“say cheese” of op zien plat “zeg eens keaze”!) stoat ze neet op’n foto , mear an de aandere kaante, he’j ooit un lachtende koo of kalf ezeen?

1 juni 2022 – Un begin maakn

Ik zalle mear wier un begin maakn met mien’n blog. Het hef un tiedje stilleleangn, wachtend op inspiratie, mear den kwam mear neet. Dus doarumme he’k vandage de haand mear an de plooge het toetsenbord èsloan en zee’j hieroonder wier un daagelijksen foto.
Vandage zee’j de skyline van Amersfoort. Amersfoort is neet alleanig un oold pleatske met met muurn en oole stadspoortn, mear doar is ok fleenk völle hoogbouw. Dit is in de buurte van het station (Amersfoort Centraal het dat rechtervoort) woer ik gistern en vandage un training Leading SAFe harre (via de link kö’j oetzeukn wat dit allemoal is). Tusken un middag met het stukn loopn kwam ik dit gebouw ok nog teang, het Eemhuis, het culturele centrum van Amersfoort. Un mooi gebouw woer allerlei culturele oetspattingen plaatsvindt. En wat ok biezeunder is, het lig nöast de Gall &Gall, zoda’j noa de culturele oetspatting aaltied nog iets könt koopn um oenen culturelen dörs te lessen, mog dat neet bie de oetspatting wean gebuurd…