Bie Deeldn, op ’n es steets seends half september wier un officiële weendmölle weend te vangn. Dit is de “Eschmolen” (jammer dat ze un naam neet in het plat hebt edoan). Het is un opvolger van de vroogere Eschmölle den in 1959 kats is offebraand. Volgens de papiern stön der in 1560 àl un weendmölle op dizze stea, dus doar zit un hele historie achter. De oole weendmölle is in 1934 tetröffen duur un storm woerbie de wiekn van de mölle ofväln. Doarnoa was het ook edoan met de mölle den oeteandelijk in 1959 finaal duur un braand wörn verwoest. Ofgeloopn joarn (seends 2010) bint ze in Deeldn heel drok èwes um de oole mölle te herbouwn, of nog better ezeg, un ni’je oole mölle te bouwn. Um an’n foto (en an de mölle) toch un betje un authentiek smaakje te geawn he’k um in zwart-wit wieregeawn. Dan likke nog knap oold….
Op de achtergroond zeej zelfs un watertoorn van Deeldn nog, un iets meender oold mear wàl zeer markant gebouw oet 1894. Den wörn gebroekt um water in op te sloan. Umdat vrogger het groondwater in Deeldn zoolt bevatn, hebt ze toen ok nog un waterleiding van 10 kilometer mun’n anlengn um leidingwater oet Almelo in’n toorn op te sloan. Dan konn de leu in Deeldn gewoon water dreenkn zonder der dös van te kriengn…
