16 november 2024 – Ikroekoe

Het was vandage wier zo wiet, un knoflook mos de groond in. Dat allemoal zoda’w tookn joar wier genog knoflookteentjes hebt um duur het etn te knooin zodat de leu könt zengn: “ikroekoe”.

15 november 2024 – Biebliewn

Wie doot oons beste um bie te bliewn met het ni’js. Vandoar dat de kraante van a tot z wordt eleazen duur iederene. Misskien wordt het tied vuur un column “De toestand in de wereld duur mr. Maarv”?

14 november 2024 – Haarfstkluurn

Un paar mooie foto’s van mie dagelijkse rondje met het oppashondje. Wie bint er natuurlijk helemoal anneweand, mear leu die hier neet vandan komt veendt dit allemoal prachtig! Hetzelfde geeldt natuurlijk ok a’w bie eur op bezeuk komme (tookn wekke…)

13 november 2024 – Woe za’k goan lingn?

Wie hebt dizze wekke un oppashondje van mie nichje umdat den op vakaansie is. Marvin (ofwàl Maarv) is nog wàl redelijk verweand, mear wat betreft ziene stea woete gearne lig isse neet zò kieskeurig. He kan kiezen tusken un lekker zach kussen en un kale boskopntaske. Un foto löt ziene keuze zeen…

11 november 2024 – Un nat begin

De waarkwekke hà vandage un nat begin! Net toe’k ’s morns op de fietse stapn um noar het station te goan, begun het te reangn. Ik kwamme good nat op het station an. Het weer kloarn later gelukkig nog op. Zelfs de zunne leut zich oawerdag zeen. Mear ja, niks is zo veraanderlijk as het weer, want toe’k ’s aongns van het station in Riessen noar hoes fietsen krea’k wier un lekkere buie op’n kop.

Het was dus un nat begin en un nat eane van’n earsen dag van de waarkwekke. Ik hale de zommerklere mear vaste oet de kaste want de rest van de wekke kan het alleanig mear better wörn….

10 november 2024 – Vleermoeskeelder

Op oons zuundaangse waandelrondje in de buurte kwamn wie langs dit bouwwaark. Het is un zaandbult met un soort schoorsteenpiepe en un zwoare iezeren duure. Ik dache ears dat het un gevangeniskeelder was woer de zwoare crimineeln oet’n Waterhook kwamn te zittn at ze wörn oppepakt, mear a’j good kiekt zit der ok nog un soort breewnbusse boangn de duure. En crimineeln kriengt neet völle pos, dus het mos iets aans wean. Noa deepe noadeankn bi’k tot de conclusie kömn dat het un vleermoeskeelder is woer de vleermuze via de breewnbusse in en oet könt vleengn. Ik binne wàl beni’jd of ter ech vleermuze inzit. Of zol het un meender geslaagd experiment wean net zoas de befaamde vistrapn woe’w ok langsleupn?

Un vleermoeskeelder
Un keelder van dichtebie
De oawerwoekerde vistrapn. Doar komp genne vis mear duurhen…

9 november 2024 – Op zeuk

Vandage bi’k op zeuk èwes noar’n stroomkabel den aans onder’t hoes noar’n oprit löp. Ik har ongeveer oetemetn woe te zol loopn en heb doar, vol goeie moed, un deep gat egreawn. Mear dach ie dat em konne veendn? Alleanig mear zaand! Elke batse de’k deeper greawn leawern mie nog mear zaand op en gennen kabel! Volgens miene “wetnschoppelijke” inschatting zolle hier wàl munn lingn. Dus dit wordt de kommende wekke nog un biezeundere oetdaging vuur mie. Hoe lös ik dit op zoonder un heeln tuin umme te greawn?

8 november 2024 – 2 vuur 12

Elken vri’jdagaongd un half neenge zit de vrouwe en ikke kloar um 2 vuu 12 te kiekn. En elken vri’jdagaongnd is het raak met mie: noa un earsen koppel bie 2 vuur 12 valt bie mie de luuke dichte.
Doarumme veun ik oonderstaonde strip oet de kraante ok zo treffend…

Ps. De vrouwe is het neet eens met ’n inhoold van de strip. Zie zeg dat ze aaltied wakker blif (mear ik kanne dat neet controleern…)

7 november 2024 – Zeute eapeln

Dit joar he’k vuur de earste keer zeute eapeln epot. Toe’k die grote knomn in het greuntevak bie de Albert Heijn zagge, dach ik bie miezelf, dat kan ik ok, mear dan goedkoper! Dus van zommer he’k bie de Welkoop twee zeute eapelplaantn ekoch die mie ongetwiefeld un rieke oogst van eapelknoln zoln opleawern. In miene dreumn hak de eapelkes op het dreuge!
Vandage was het dan zowiet: de zeute eapeln kon’n oet de groond. Vol verwachting klopn mie harte. Zo’k ter neet te völle hemn? He’k wà genog baargruumte? Het resultaat völ nogàl teangn. Niks gen grote knomn, met meuite (en met’n bril op) zag ik un klein knölke, net genog vuur één klein häpke eapel. Dat was alles!
Veurlopig hoolt wie het hier mear bie gewone eapeln, gen flantuutn mear! Zonnen nuchtern eapel bin ik dan ok wier…

6 november 2024 – Stereo

Diize muurschildering kwam ik bie het lunchrondje in Utrecht teangn. Het is professor Van ’t Hoff den bie zien promotieoonderzeuk in Utrecht in 1874 de stereochemie hef ontdekt. In 1901 kreage de Nobelpries vuur al zien waark. He was ziene tied à veer vuuroet, want toene kloar was met ziene studie in 1874, harre meuite um waark te veendn in dit vakgebied. He kreag waark as assistent bie de Rijks Veeartsenijschool (faculteit Diergeneeskunde). Mear oeteandelijk is alles terechte kömn en wörn e zelfs professor in de chemie.
Stereochemie is neet da’j twee chemische stoffen met beide haande duur mekaa mengt (is ok stereo…) mear köj zeen as ruumtelijke scheikunde: ondaanks dat molecuuln dezelfde atoomn hebt, könt ze toch anders wean oppebouwd, bievuurbeeld as mekaa’s speegelbeeld. En dat kan wier tot gevolg hemn dat ze compleet aanders reageert. Un vuurbeeld hiervan is Softenon, dat oet twee spegelbeeldn van molecuuln bestön. Un een’n waarkn goed teang misselijkheid mear un aandern zorgen vuur lichamelijke ofwiekingen bie ongeboorn babies. Neet onbelangrieke dus, die sterochemie!