Maand: december 2024

Joa, joa, wie bint vandage bie dag 1 van’n Adveantskalender annekömn. Vandage zee’j un foto van de duurn van’n Dom in Maagdenburg in Duutslaand. Doar wa’w vandage en dus ha’k ok direct un foto vuur’n blog. Wat opvaalt an dizzen foto bint de bloomn op groond. Die bint der neereleg as teakn van metleawn vuur de slachtoffers van’n anslag op de kasmaarkt hier, vurige wekke vri’jdag. Alles was hier vandage dan ok dichte. Gen eankel kröamke was ter lös. De kasmaarkt was compleet oawer.

A’j wilt weatn wat vuur iconisch verhaal er achter de leste duure van’n Adveantskalender zit, mu’j op’n foto hieroonder drukn…

Vandage he’k de duurn van un klein mausoleum in Quedlinburg op’n foto stoan. Wie bint hier op vakaansie en wat is dan neet meuier um un’n actueeln foto te gebroekn. Quedlinburg is un prachtig oold pleatske (Unesco Wereld Erfgoed) met völle vakwaarkhuuze en lig net boangn de Harz in Duutslaand. Genog te zeen vuur de moderne nomaadn as wieleu.
Mear wat zit achter de duurn van dit mausoleum? Eawn drukn en ie weet het…

Nog 3 dage en dan is het Kas! Doarumme vandage mear un foto met snea want un witn Kas zit er volgens de kearls van het KNMI dit joar ok neet in. En wie munt de gedachen hieran wàl leawndig hooln.
Dizze schure steet in Tschagguns in Oostenriek, un pleatske woe’w àl joarn op weentersportvakaansie goat. En a’j wilt weatn hoe good da’k kanne skiën, mu’j mear op’n foto drukn, Dan goat de duurn vanzelf lös…

Hieroonder zee’j de hervormde kaarke in Ootmöske. Den is in 1810 in opdracht van koning Lodewijk Napoleon ebouwd. Un readn hiervuur was dat de grote kaarke, den tot dan duur de protestaantn was gebroekt, wörn teruggegeawn an de rooms-katholiekn, Dus toen mos ter un kaarke biekomn en den wörn toen in un rap tempo ebouwd. Het joartal van het bouwn zee’j trouwens net boangn de duure stoan.
A’j op’n foto drukt köj nog mear leazen oawer de aandere kaarke, un pseudo basiliek van Ootmöske.

Ps. Zol oonzen könnig Willem Alexander dat ok nog vuur mekaa könn kriengn? Eawn un kaarke loatn bouwn?

Wat zit er vandage achter de duure van de Tweantse Baanke in Dordrecht? In elk geval gen geeld want dat is via fusies en overnames oeteandelijk bie de ABN-AMRO terechtekömn. En ie weat hoe het die leste baanke is vergoan met de kredietcrisis… Dus wat dan? Eawn drukn op ’n foto en ie weat het…

Het is wier tied vuur de Kerstborrels. Zo ha’k ter vandage ene in Utrecht woerduur ik dit stukn pas morn konne schriewn. Un gevalletje van back to the future dus 🙂
Bie un borrel heurt un duure en dizze duure heurt dan ok bie’n un restaurant in de buurte van Dresden woe’w in 2014 op vakaansie warn. Dat was un enigsten borrelachtigen foto van nè duure den ik harre. Mear a’j op’n foto klikt kom ie niet in Dresden mear in Utrecht oet woer ik van het waark smangs borrels hebbe. Snap ie het nog? …

Bie dat natte en sloffe weer van de leste dage past er mear éénn foto van ne “duure” en dat is oonderstoand hekke. Ie wordt zelf ok nog gries van het landschap derachter….
Mear, houd moed! Misskien doo’j nog inspiratie op a’j het verhaal derachter least…

Hieroonder zee’j de duure van un oold kaarkse in Gouda. Doar wa’w vuur un paar wekke. Het mooie hiervan veen’k dat het mear un klein duurkn is, mear a’j heb’t ekeuzen vuur dizze weg, neet mear terugge könt. Ie könt er dan neet eawn vuurbie loopn umdat de weg liek op de duure angeet. Doar is gen ontkomn an, hoe groot de duure ok is!
Met al dizze gedachen mo’k toch eawan teruggedeankn an Corona toe de kaarkn ech leug warn en bleawn…

Ne duure gebroek ie vaake um woeraans binn te komn. Ie könt er natuurlijk ok met noar boetn. De vroage is wa’j dan zeet. Vandage loa’k oe zeen wa’j zoln zeen (is dat neet dubbelop?) a’j de oole achterduure van het oole hoes zoln lösdoon. Wat vuur un oetzich he’j dan? Eawn drukn op’n foto en ie weet het…

Nog 10 dage dan is het Kas! De kraantn stoat natuurlijk wier vol met de vroage a’w dit joar ok un witn Kas kriengt. Ikzelf deanke dat de kaans doarop heel klein is mear ie bliewt natuurlijk hopn. Dat zol toch mooi wean! An de aandere kaante: hoppe is oetgesteelde teleurstelling, dus rekn ter mear neet op…
Um toch dat geveul van un wittn Kas un betje vaste te hooln he’k vandage de duure (poorte) in weenterse sfeern eheuln. En het gedich met’n foto doarachter past er ok nog bie!