Auteur: Kroaks Henk

Vandage kwamn de leu van de Katoelnkiekers bie oons um de nestkaste van de katuulkes schone te maakn. Doar zat één oelnvröuwke in de kaste en den hebt ze ok eawn controleerd op un reenk (vuur de herkomst). A’j un earsen foto bekiekt, wasse het der neet helemoal met eens. He bleus zich op en doar wörn grote oongn oppezet. Het leak dan heel wat. Mear a’j un tween foto kiekt, was het neet zo völle. Un heanke vol, mear is het neet.
Zo’j hier ok un parallel met hedendaagse politiek könn trekn? Smangs is het heel völle gebloas, mear oeteandelijk is stelt het heel weinig vuur…

lk heb vandage un ooln wilgenboom ziene twee-joarlijkse knipbuurte egeewn. Het wörn dizze keer un coupe “gedekt model”. Gelukkig hoown der gen permanentje te wörn èzet…

De sneeklokjes bint dit joar an de late kaante. Vuurig joar um dizze tied bleuin ze àl volop. Het zol natuurlijk könn da’w nog un streng weenter kriengt en dat ze doarumme nog heel vuurzichtig bint. Zie munt de krachen spoarn vuur de slimme tiedn die ter nog ankomt. Ik deanke dat wie dat ok mear doot en vuurlopig nog genne kotte bokse of aandere zommerkleare antrekt. Ie munt de (weer) goden neet verzeukn…

Heel vuurzichtig maakt dizze twee zilverreigers contact met mekaa. Het lik wàl of ze deankt “Good oetkiekn met vrömde vogels, mie moo zea dat àl”. Noa un half uur zag ik dat de vuurzichtige toenaderingspogingen op niks wadn oeteleupn. Un gevalletje van “Gewogen en te wit gevonden”?

Vandage wa’w op Urk, ja dat zeg ie zo! Het is neet in Urk, mear op Urk, umdat het vrooger un eiland was. Urk besteet feitelijks oet un grootn bult met keileem den in de middeleeuwn steeds mear in het laankzaam riezende water van de Zuidzee kwam te lingn en doarduur un eiland wörn. De boern wörn toen vissers.

Wie hadn vandage un neawn- en nichendag op Urk. Mien tante is vuur’n oorlog met un Urker vissersman etrouwd en zodoende he’w nog femilie op Urk woon’n. Dat was un goeie readn um hier den dag te hooln. Dus het hele spul oet Tweante was vandage noar Urk vertrökn. Noa gezamenlijk koffie dreenkn he’w un roondwandeling duur Urk emaakt oonder leiding van un gids. Den hef oons alle biezonderheden van het oole Urk loatn zeen: kleine huuskes, smalle ströatjes, oale boerderi’jn e.g.z.m.d. Conclusie is dat het vrogger wàl un armood op Urk was. Rechtervoort is dat aans. De visindustrie op Urk hef un joarlijksen umzet van vief miljard euro, dat is ongeveer 20 proceant van un heeln omzet van de provincie Flevolaand woer Urk (22.000 inwoners) deel van oetmaakt. Un gids was ter nogwàl greuts op dat dat kleine Urk zovölle geeld in het laatje brach. Mear toe’k hum vreuge woer de commissaris van de koning in Flevolaand dan vandan kwam, mosse mie het antwoord schuldig bliewn. Want dat is natuurlijk Eanter! Kortom, de sfeer wörn der neet better op…

Noa de roondleiding ha’w nog nè lekkere lunch in het restaurant van mie nichte, mear helaas zoonder vis. Den wörn zeker te deur betaald …

in de kraante van vandage stön dat de sukelaafabriek van Droste dichte gung. Te weinig inkomsten en te hoge kossen. Jammer, want dat is wàl un stukn Nederlaands aarfgood wat verleurn geet. Mear ja, zoas Cruijff zolle zengn “At het neet geet, dan geet het neet”.

Droste is ok bekeand van zien Droste cacaobus effect, wa’j könt beschouwn as un blik in de oneindigheid. Woer astronoomn miljoenen euro’s oetgeewt an deure telescoopn um un blik in het oneindige te könn waarpn, lukn dat de ‘gewone’ leu met te kiekn op un cacaobusse van Droste. Un verpleegster op de busse blif zich mear herhaaln, tot in het oneindige too. En dizzen blik kossen gen miljoenen an apparatuur…

En hoe toevallig da’k dit ni’js oawer Droste vandage, leazen, want dree joar geleane, op 7 februari 2022, ha’w dit effect ok bie oons met Marvin, het heunke van mien nichtje. Un hoond zag zich op de televisie kiekn noar zichzelf op de televisie. Dat beeld bleaf zich mear herhaaln. Marvin snapn der niks van!

Dus doarumme de volgende suggestie in het geval as Droste failliet geet. In plaatse van het Droste cacaobus effect goa’w nò sprekn oawer het “Marvin zöt zichzelf op de televisie” effect. Ik deanke dat vuural de jongere generatie dit völle earder begrip, want hoevölle leu hebt nog un cacaobusse in hoes?

Wie hadn vandage met waark un zogenaamden heidag, dat is un dag woe’j oe met oe team op de tookomst vuurbereid, zoonder da’j lastig wordt evälln duur allerlei dagelijkse beslommeringen. Ie trekt oe min of meer figuurlijk terug in un alleenstoand hutje op de hei.
Oonzen heidag was vandage neet op de hei maar milnin un drokke stad: Rotterdam. Wie zat’n in un kantoor van de NS in hartje stad, vlak bie het station. Dat station is un prachtig object um op’n foto te zettn, dus hieroonder zee’j het resultaat. Vuur de rest he’w vandage gennen pol heide ezeen, mear wàl schöape, die leupn der genog roond…

Foei, wat was het ofgeloopn wekke toch un grieze wekke. Vanof moandag tot an vandage he’k gen zunne zeen mear alleanig grieze lochen. Zelfs de eeknbeume vearderop in de weide verdwean’n heanig in’n mis. Doar was gen wille an’t wear te beleawn.
Mear, hold mood! Morn he’wn blauwn moandag en dan is alles wier völle kluuriger en opwekkender…

Ik heb les un ooln film oet van Arnold Schwarzenegger èkekn: The Terminator. Dizzen film koomp oet 1984 en is dus àl 41 joar oold (woer blif de tied!). Un heel bekende zinne oet dizzen film is “I’ll be back“. Kiek, en dat dach de weule vanwekke ok, toe’te bie oons het gazon op’n kop zetn: “Ik komme terugge!”. Want ziene vuurgangers hadn un moand geleane heel wat heupe in het gazon emaakt. Helaas vuur eur 🙁 ha’k ze allemoal evängn, dus he har nò bie oons het alleenrecht op het gazon.
Mear ja, succes is neet eawig durend, want ok ik dache: “ik komme terugge”. Mear dan met nè weulnklemme ( weulnstappe). En dat hef heel good ehelpn, want de weule (mien opoe zea vrogger “nè vroote) zien succes was mear van heeln kotn doer. Un volgenden dag was de weule neet mear…

En Arnold? Den is ter nog steeds. Noa gouverneur van Californië isse nò Kerstman in New York

Im Utrecht hebt ze wier un lechshow met verschillende keunsobjecten. Oonderstoanden foto van un “beroemden” Zweedsen keunsteraar Aleksandra Stratimirovic, stelt het menselijk brein vuur. Het bint dwarsduursneden van twee briljante breinen en het löt un brainsstorm zeen. Vandoar de verschillende kluurn. Héél toevallig stoat dizze breinen net op de stroate vuur het NS hoofdkantoor. “Soort zog soort” dach ik, toe’k het kantoor ingunge, want bie de NS he’j ok van die onmeunige breinen…

Un tween foto is un object dat neet op de lieste stön van keunsobjecten mear den ter zeker neet mag ontbrekn. Feitelijks is het greutste en meuiste keunsobject van de hele show. Het steet op 348.000 kilometer afstaand mear gef genog lech zoonder dat het energie kost. En het veraandert ok nog in de loop van de tied van vorm en lechstaarkte! Wat wi’j nog mear? Nò nog eawn noazeukn welken Keunstenaar dit hef emaakt…