Categorie: Uncategorized

Op 21 augustus he’k bie de gemeente Riessen-Hooltn un melding emaakt van vuilniszäkke die in’n baarm van’n Leijerweerdsdiek lean. Foto derbie en ok nog miene Digid oppegeawn, zoda’k op de heugte kon wörn eheuln van de opruumactie.
Vandage (noa 19 dage…) krea’k eindelijk berich dat de melding was offehaandeld. Zie bedaankn hartelijk mie vuur het duurgeawn van het berich want zie veend het heel belangrieke dat de openbare boetnruumte veilig en schone is.
Ik heb vanmiddag, toe’k teruggefietsen van het station, eawn un kleine controle doan, um te kiekn of un pröttel wàl weg was. Dat was dus neet het geval! De gemeente steurt mie dus un berich wat neet klopt. Kiek, zo kan ik ok miene gemeentelijke belastingen betaaln. Gewoon neet betaaln en dan zengn da’k ze wà betaald hebt…
Dus ik heb mear wier un ni’je melding emaakt woerin steet dat eur mooie berich neet klopn. En of ze dit subiet könt oppakn. En da’k het heel belangrieke veende dat de openbare ruumte good oonderheuln wordt…

Ik heb mie un weeldcamera anneschaft. Wie woln eens gearne weaten wat hier ‘s nachts um het hoes roondlöp. He’w un steenmarter? Woer is de wolf? Wat vuur onbekeande deers loopt hier nog mear roond in’n Waterhook? Vroangn genog dus tied vuur un camera!. De ofgeloopn nachen he’k um oetprobeert. Helaas (of gelukkig?) gen leeuwn of wolven hier, mear wàl katn (van de Lis) en un stekkelvaarkn. Dizze deers bint ok weeld mear van un aandere categorie…
De kommende nachen bliew ik het probeern met’n camera. Misskien löp hier nog un deer roond wat niemand nog keant….

Bij het lunchrondje in Utrecht kwam ik dizze muziekband teangn. “Hé, leuk, doedelzakmuziek”, dach ik. “Zol het un Schotse doedelzakband wean?” Mear toe’k wat vearder keake dan dat mien’n neuze laank is, leazen ik op het vaandel “Traditie, Familie, Privé-eigendom”. Het blik dat dit de leus is van Civitas Christiana, un  ultra-conservatief genootschap wat volgens Follow The Money ons wil teruggebrengn noar de Middeleeuwn.

Kiek, dan snap ik woerumme dat ze hier zo stoat, ie zeet zelfs nog un kearl met un roeptoeter wat zengn. Want in de Middeleeuwn hadn ze nog gen radio, televisie of internet met Facebook en Instagram. Alles gebuurn via het moondwaark.
Nò vroag ik of mie hoe de leden van Civitas Christiana de contributie betaalt, Zol dat in natura wean (bevuurbeeld in schöape of in un murre eapeln of zoln ze hiervuur dukaatn gebroekn? Want ie mangt natuulijk neet met un Tikkie betaaln…

De koo milnin is wàl heel ni’jsgierig noa wa’k doo. Hee rekt zich helemoal oet um te kiekn! De babbelbox vrög doarumme “woernea was ie zo ni’jsgierig da’j un nekke hoaste verrekn bie het loern?”…

A’j dachen dat in Utrecht de plaantn netjes met’n geeter water kriengt, dan he’j het mis. Het geet gewoon met un trekker met’n giertank vol water. Zoln ze in het vuurjoar de plaantn ok op dizze maneere bemessen met un betje driefmes? Dan wee’k zeker dat de kantoorn sneller leugloopt dan dat ze ooit met un ontruimingsoefening hebt mettemaakt…

Onder het motto van “Wat in Japan kan, kan ok bie oons” experimenteert de NS met oawervolle treinen. Gewoon de helfte meender loatn jaangn en dan krie’j de treinen wàl vol!
Het earste experiment was vandage op station Amersfoort. Un conducteur steet àl kloar um de leu nog un betje an te duwn. Oonderwiel neuriet zie zachjes het bekende leedje “Der kan nog mear bie in, der kan nog mear bie in”….

Kiek, dit bleef ter oawer van’n barbecue van gisteraongnd. Un zwatte hoodie, un grote taske met veurwaark, un schaarpe pinne en un paraplu. Het döt mie deankn an de oetrusting van un voetbalsupporter van vak P den bange is vuur’n betje reangn. Wat un watje….

Wie hebt vandage un barbecue vuur de femilie organiseerd. Wie zeet mekaa as femilie neet zo vake mear as vrogger want het koffiedreenkn op zundag bie het ooldershoes is neet mear en dat was juust het moment da’j mekaa allemoal zaggen. Un barbecue noa de vakaansie leek oons doarumme un mooie maneere um mekaa allemoal te zeen en bie te kuiern.

Zo ezeg en zo edoan! Vri’jdag ha’k de garage àl oetekeerd, al’n pröttel was weggebrech en ik har zelfs de heage esneuid en’n hof eschoffeld. Want het mut natuurlijk wàl kant wean a’j visite kriengt. Zie kiekt oaweral noa…

Un barbecue verleup good. Het weer völ, op zien Twents ëzeg, neet teangn. Op zien Nederlaands èzeg was het weer perfect! Wie konn lekker boetnzitn met un drankje, hadn un good stukn vleis van Vincent van de Boone en noada’w warn oetegetn gung un veurkorf an. De wichter konn oondertusken eure energie kwiet op het gazon.

Tja, wat wi’j nog mear?

Elk joar wordt er in Eanter an het eane van de vakaansie vuur de wichter van basisschooln de Vakantie Bijbel Week eheuln. Dit wordt organiseerd duur vrijwillers oet de verschillende kaarkn. Dree dage wordt er dan eknutseld, ezungn en espöld um de oolders un betje te ontlasten van het kroost. Un lessen oangnd is er aaltied iets speciaals. Dit joar was dat un musical oawer Jona den in’n walvis noar Ninevé gung. Dit wörn ebrach duur un theatergezelskop “De vliegende speeldoos” ( zes leu). Alle wichter (ongeveer 100) deadn hier an met en monn in een’n dag het stukke learn. Un hele actie dus. De oetvoering was een groot succes! Ie wörn as toeschouwer gewoon mettenömn in’t verhaal. Ik veen het aaltied mooi um te zeen hoe’j met heel weinig middelen toch un heel verhaal könt verteln. Hoe dooi un walvis noa? En hoe spölle ie dat Jona in de maage van’n walvis zit? In dit geval was dat met völle echo in’t geluud want zonnen walvis is natuurlijk gen klein viske. Good eslaangd dus!

En woerumme was ik ter bie? De zönne is àl zesentwintig en ik heb, bie mie weatn (de vrouwe les met…), gen noageslachte in de basisschole leaftied. Nee, ik moche foto’s maakn vuur de organisatie. Bie het inleidend woordje van’n vuurzitter kreak direct àl un fikse veere in de …. umda’k, wörn der èzeg, zulke mooie foto’s maakn. Mien’n aongnd kon toen àl niet meer kapot….

Wie hadn vandage ofscheid van un collega en dat wör eheuln in un café. Nò he’j verschillende soortn café’s (broen, modern, eetcafe) mear dit was ter ene in de buitencategorie: zie hadn hier wà mear dan 40 tapkraan’n met eawnvölle soortn beer. Kearl, kearl, wat un prachtig spöl. Zovölle soortn beer woe’j der mear un paar van könt preuwn. En dan he’j natuurlijk ok nog keuzestress. Wat zol un lekkersen wean? Volgens de plaatjes bie de tapkraan’n warn ze allemoal aarg lekker. Kortom, het was knap meuilijk. Dus oeteandelijk he’k ter ene oetekeuzen den aarg good smaakn, en he’k mie doar anneheuln. Want stel is vuur as het beer oet un volgenden tap meender lekker smaakn….