Met de ruilverkaveling in Eanter hebt sommige boern un àànder stukke groond èkreengn. En ie weet hoe dat geet, het nie’je stukke groond is aaltied slechter dan waj eers hàdn. Of het is te hooge, of te lèège of te nat of te dreuge, mear het deungt meestal neet. Dus dan wordt er met man en mach èprobeerd um het better te maakn. In oonderstàànd geval was het stukke groond te lèège en dus te nat (doarumme het het hier un Waterhook). Het hele stukke groond wordt nò oppeheungd met zàànd dat met de verbrèèn van ‘n Eantergraawn is vri’j is èkumn. Heele dage wordt er eveurd met trekkers met zààndkoarn um het mear un betje op te heungn. Het lik wà op un slagveeld met bomtrechters oet’n oorlog of àànders wa op un weide met onmeunige weulnheupe. Eers wordt alles op bultn èkieperd en doarnoa mut er nog un buldozer komn um alles liek te maakn. Het mut wat kossen. Ik vroage mie ech of of de kossen die hier met èmeuid bint wàl opweangt teangn de eventuele meeropbrengsten…
