19 meart – Den sik oet Wierdn

Ken ie het gedicht van den sik oet Eanter? Den lussen alleanig mear greun grös, dus toe ze hum heui vuurzettn, lussene het neet. Mear toen kreage un grootn greunn bril op’n neuze! Het heui kreeg un mooie greune kleur en hee beet erin of het meigrös was. Ofwel, ai de verbeeldinge mear hebt, zöt er alles zo oet zo ai het geane wilt zeen.
Zo geet het ok met un wethoolder oet Wierdn den vanwekke reageern op un berich oawer un nieuw bedriefspàànd op industriegebied “De Elsmoat”. Doar kwam van alle kààntn commentaar op het oeterlijk van dit gebouw. Het lik wà un bunker of zwoar bewaakte TBS kliniek, zo kaal steet het doar bien’n ingaank van de Elsmoat. En dat ondaanks dat er was èzeg dat alle bedriefspààndn  op de Elsmoat zolln passen in het “duurzame geheel” en dat met name de pààndn bie’n ingàànk een zekere oetstroaling monn hemn. Het moss neet rommelig of kaal owaerkomn.
Un wethoolder oet Wierdn reageeern hierop duur te zengn dat het gebouw nog neet of was (…), doar kon nog van alles gebuurn um het antrekkelijker te maakn,  en dat an de vuurkaante al un fikse boomriege stun. Ik heb vandage eens good èkekn mear ik zagge zo op het eeste gezichte genne fikse boomriege. Un paar struuks in’n wal bie de hoondeclub was alles wa’k zagge. Op’n foto hieroonder zeej zelfs gennen eankeln boom…
Ik deanke doarumme dat’n wethoolder het gedich van un sik oet Eanter ok keant en doarumme zichzelf un bril hef anneschaf  met doarop un paar verticale streapkes (= beumkes) èteaknd. Oaweral woe ze kik in de gemeente Wierdn zöt ze nò un fikse boomriege. Bie elk nieuwbouwproject in Wiern stoat nò àl un fikse riege beume. De natuur in de gemeente Wierdn mag doarumme neet klaang, en de burgers natuurlijk nog meender…, want an alle eisen van de plan’n is voldoan. Miskien dat het doarumme zo good geet met de nieuwbouwprojectn (Zenderink, Berghorst, Elsmoat, Zuudbrook)!
Wat crisis…, niks gen crisis, Wie zeet het gewoon neet good want wie hebt un verkeern bril op…