Behalve un sloat van gistern bint de pöln ok riepe um èplukt te worn. De pöln bint onderdeel van de “vlinderbloemigen”,`één van de grootste femilies van bleuiende plààntn in de wereld. Het kenmaarkende van deze plààntn is dat ze pöln vormt. Mear woerumme dat ze vlinderbloemigen heet, wèè’k neet. De bloomn liekn neet op un vlinder, mear miskien is het dat ze bezoch wordt duur vlinders (mear dat wordt de ààndere plààntn ok wà). Ai kiekt noar de naamgeving van de bloome dut het juust mear an un zeilboot deankn. Het grootse bloomnblad neumt ze de vlagge, terwiel de twee kleine blaadjes “zwaarden” wordt èneumd. Twee vergreuide blaadjes bie’n stengel oonder an de bloome neumt ze de “kiel”. Dus het lik mie better um dizze plààntnfemilie in plaats van vlinderbloemigen mear zeilbootbloemigen te neumn! Ik misse dan alleanig het zeil nog, mear doar köj van zengn dat het was èstrekn in verband met een stormwaarschuwing…
