Het is vandage volle moane. Gelukkig zatte neet verstopt achter de wolkn en leute zich volop zeen. Un mooi oonderwaarp um op’n foto te zettn dach ik, mear het kossen nog wà knooin um um de moane der schaarp en duudlijk op te krieng.
Umdat het zo duuster is denkie da’j un lange sluutertied neurig hebt, mear de moane gef bes wà völle lech of. Ie hebt genne sluutertied van 30 seconden neurig, mear slechts van 1/100 seconde. Met 30 seconden sluutertied kreej eenn grootn witn plear te zeen op’n foto temilln van al het duuster.
En doarbie kwam ok nog dat het lastig is um in het duuster schaarp te stelln op de moane. Ie zeet àl niks, struukelt hoaste oawer het statief in’n duuster, un automatischen focus dut ok àl neet, want doarvuur steet de moane te wied weg, dus dat is gewoon met het handje en het ooge op de tast schaarp stelln.
Mear al met al is het mie èlukt en he’k un schaarpn foto van de moane èmaakt. Met un foto van zunne wach ik nog mear eawn…
