5 oktober 2015 – Ni’j verkeersbröt

Dit bröt zag ik vandage langs de weg stoan in’t Ypelo. Un nieuw bröt met doarop de tekst um vuural neet te appn en te facebookn oonder het jaangn. Ik weet neet wat uleu doar van veend, mear ik veene het oawerbodige regelgeving en grote flauwekul. Vuural in het boetngebied. Zolln ze nò ech deankn dat hier, in the middle of nowhere, zovölle verkeer langskoomp? Un paar trekkers en un paar verdwaalde auto’s en fietsers. En dan munn doe ok nnog et toevallig eawn appn, twittern of facebookn (zie komt hier net oet un schaarpen boch dus zovölle tied hebt ze nog neet èhad). Ik weet neet eens of ze hier wàh bereik hebt…
Zo kö’j elken meter van’n baarm langs weg wàh gebroekn vuur waarschuwingen da’j vuural op de weg munt lettn. Op het leste mu’j nog mear op brönn langs de kàànte van de weg kiekn dan op de weg. En is dat neet geveurlijk? Stel is vuur da’j un bröt mist! Zòl’n all die brönn ech zo völle oethaaln? Volgens mie heft de gemeente geelt neet in de gaatn hoevölle at er àh langs de weg stoat. Alleanig degene den dit allemoal maakt wrif zich nog un paar keer extra in de hàànde at er wier un nieuw bröt mut kommn. “Natuurlijk, dat is erg noodzakelijk” zolle wàh zengn met doarbie in zien achterheuwd ziene knippe.

Ik deanke dat er un nog één speciaal bröt mut kommn met doarop de tekst da’j op de weg munt lettn en neet mear op de brönn langs de kàànte. Dat hef tenminste effect. Dan köj de rest allemoal opruumn!