Zo af en too leas ie in de kraante dat er wier un deer op de zwatte lieste wordt èplaatst umdatte met oetstarven wordt bedreigd. Dat is allemaol neet zo mooi umdaw der as mensheid wier un mooin pröttel van maakt.
Nemt nò nè neushoorn. Den wordt in Afrika oettemoord umdaw deankt dat zien hoorn biezeundere krachen hef. Un betje fiengemaaln neushoornhoornpoeier dut bievuurbeeld woondern at het allemoal neet zo good mear lukt in berre. En ok aj kopzeerte hebt of meuilijk noar de wc könt, un betje neushoornhoornpoeier helpt oaweral teang! De leu wilt er good geeld vuur betaaln, en doarumme wordt die deers in Afrika allemoal neerèschötn.
Nò pleit ik ok vuur de witte lieste. Doar komt allemoal dears op te stoan woer ter völs te völle van bint. Ik wear àl twee kandidaatn:
Met stip steet de naaktslakke op eene. Met dit natte wear bint er zo völle van da’j àl munt oetkiekn daj der neet owaer oetglied. Zie vret oe alle miene duurzaam en meender duurzaam geteelde greunten in’n hof op! Doar helpt gen streuin met korrels mear teangn. Zie gliet er gewoon oawer hen…(en’n hof is inmiddels besteampeld tot zwoar chemisch verontreinigd gebied woe’k gen duurzame greunte mear kanne verbouwn…)
Un tween kandidaat is de mugge, den bloodzoeger! Net aj ‘s aongs lekker in berre lingt koompe oe lastigvalln. Heenderlijk gezoem en un volgenden dag dikke jökkebultn op de hoed. Doar bint er dus ok völs te völle van…
Aàndere kandidaatn wee’k zo noch neet vuur de witte lieste. Misskien dat uleu nog wat vuurbeeldn könt bedeankn?
