Ik heb mie vandage vuurènömn um de hele moand juni dizzen blog bie te hooln. A’k zo achterumme kieke noar de ofgeloopn joarn veen’k het heel mooi um te leazen wa’k toe allemoal heb mettemaakt. De foto’s en un klein stukn in het plat helpt mie te herinnern dat neet alles in een grieze brei vuurbie trek, en da’j dan achterof munt zengn dat de tied zo snel geet. Het is juust aandersumme: wie goat der zo snel duurhen!
Mear eers un titel van dit stukn: het geet neet oawer de rockband Status Quo, de keals met de gitaarn en spiekerbuiskes, mear oawer de status van de bouweri’je bie oons. De leste wekke bi’w in un status quo, ofwel un bestoande toestand terechte kömn, Un annemmer hef de hooltskeletbouw te late besteeld en doarumme kö’w eawnkes neet vearder. Doarnöast hebt ze ok un tekort an timmerleu dus un bouw schöf nog veerder op. Het is dus ech un status hò! Het steet stille. Vandage doarumme wier met un oetvoerder ésprökkn. Den gaf an dat ze oawer un wekke wie leu könt leawern vuur het in mekaar timmern van de dan hoppeluk geleawerde HSB (hoolt skelet bouw) paneeln. En dan goa’w oawer van un “status quo” noar un “status vèdan”! (en woerumme köw gen mooi dialectwoord vuur dizze zegswieze gebroekn?)…
