“Doar geet hen!” Ofwà “Wie trapt em an, wie goat op vakaansie!”. Vandage bi’w offereisd naor Prägraten am Großvenediger. Un mooi pleatske in het Virgental in Oost-Tirol. Tien joear geleane wa’w hier ok èwes, en dat is oons toe mirakels good bevälln. Zo good zelfs da’w der dit joar wier hengoat. Het was un hele reize, vuural umda’w langs München monn, woer toch oarig wat files stönn. Mear met wat sighseeing van het Beierse plattelaand (creatief gebroek van het navigatiesysteem) he’w un groot gedeelte oawereslaon. Ik weer neet of het in de tied wat schealn, mear toch, het geveul da’j duur könt bliewn jaangn schealt wier un hoop frustratie. Wie hebt er zo’n betje 12 uur oawer edoan um der te komn, en dan bi’j het gezit in’n auto ok wà zat. Mear noa het oetpakkn en wat dreenkn en etnn, bi’j de reize zo wier vergettn . Wie harn zelfs nog energie oawer um un kleine spaziergang te maakn. Umda’w an de St Andrä stroate in Prägraten zit, kan der natuurlijk in dizze buurte gen kappelke van St. Andrä ontbrekkn. Zie bint namelijk in dizze buurte good rooms, zoas wie dat zengt…
