Wie hebt vandage Straatsburg bezoch, de hoofdstad van de Elzas en smangs ok un betje de hoofdstad van Europa a’t het Europees Parlement der wier vergadert (tot frustratie van völle leu die dit complete tied- en geeldverspilling veend, mear doar he’w het neet oawer). Straatsburg is un oole stad den duur de Romeinen is èsticht. Umdat het op de greanze van Fraankriek met Duutslaand lig, is de stad in de loop der eeuwen un paar keer hen en wier ègoan van Fraankriek naar Duutsland (en visa versa). Seends un Tween Wereldoorlog is de stad, net zoas de Elzas, wier oonderdeel van Fraankriek. Oorsponkelijk wörn der Elzassisch Duuts eprökn, mear zo toverdan wordt dat steeds mear verdrungn duur het Fraans. Wat mooi is, da’j oaweràl Duutse woordn zeet die dan in het Fraans munt worn oettesprökn. Ik vroage mie of in hoevèè dit de Fraansken lukt…
As eerste he’w vandage natuurlijk un kathedraal (Fraans) of Münster (Duuts) bezoch. Met’n bouw van ‘n kathedraal wörn in 1015 begunn, mear noa wat kleine teangnslaangn wa⁹s’e pas un dikke 400 joar later, in 1439, kloar. Do mo’j nò is met ankomn: “sorry, de bouw is wat jaartjes later (400) pas klaar”. Het laand zol te klein wean! Mear toe kon kon dat nog. Gen parlementaire enquetes of ministers die opstapt.
Wat ok opmerkelijk is, is datte mear een’n toorn hef. De meeste kathedraaln hebt er twee. De bouwers warn bange dat un tween toorn zol wegzakn in de blubberige groond en datte dan un earsen zal metslepn. Dus doarumme is het bie ene bleawn wat op zichzelf wier mooi is.
Wie zachen ok nog un klein paleisje dat bie miene vrouwe oet de femilie koomp (un Fraansken tak). Het Palais de Rohan (de vrouwe het van achternaam Rohaan) is een bisschoppelijk paleis oet de 18e eeuw. Aaltied handig zo’n paleisje in de femilie, vuural a’j un weekendje weg wilt.
Noa de middaglunch met natuurlijk flamkuchen (tarte flambée) he’w het oole stadsgedeelte “la Petite France” bezoch, dat besteet oet völle pittoreske vakwaarkhuuze. Völle toeristen hier, hoe zoll dat toch komn?
Mear Straatsburg is vuural mooi umdat het un kruusing is tusken Fraankriek en Duutslaand. Diegelijke Duutse vakwaarkhuuze in Fraanse sfeern, leu die Fraans en Duuts kuiert, Choucroute in plaatse van sauerkraut en goat zo mear veerder.
Volgens mie hadn ze 78 joar geleane neet èdach dat dit zo good zol oetpakn…
