Wie hebt vandage un open dag van de boerderi’jnstichting ‘Twentse Erven’ bezoch. Dizze stichting is ericht op het behooln van oolde Tweantse boerderi’jn en organiseert regelmoatig open dage (of is lösse dage?) hiervuur. Vandage was dat in de buurte van Eanter en dat leak oons wà mooi um de twee boerderi’jn die wörn annedoan te bekiekn. Dus de vrouwe en ikke bin’t ‘s morns op de fietse stapt, richting eerste oolde boerderi’je (of erve, dat lik dan iets sjieker). Dat was un vuurmaligen scheepsherbaarg en oawerloaadplaats ‘Binnen Gait’ an de Regge. Hier wörn vrogger de goederen oet de Pruuse oawerelaadn van de koare noar un Eantersen zoomp. Dat gebuurn in ne schure woer de weg duur hen gung zodat de voerleu gen lastige manoeuvres met peerd en waangn hoown oet te haaln vuur het laden en lossen. De schure stamt oet 1751 en de gloriedage, inclusief het gebroek van ‘n scheepherbaarg, warn dan ok in die joarn. Later met de komst van’n trein en het anlegn van bettere weangn wörn het allengs meender en begin 1900 was het dan ok helemoal oawer vuur ‘Binnen Gait’.
Noa Binnen Gait hew ‘Erve Senkeldam’ in ‘t Elsenerbrook bezoch, een kwarteer fietsen. Oonderweg ha’w nog un kleine huwelijkscrisis toe’w de weg kwiet warn, mear noa wat intern oawerleg kwamn wie oeteandelijk op de goeie bestemming oet.
Erve Senkeldam was tot 2015 un vervaln pröttel. Ik heb in 2011 nog foto’s van het spul emaakt vuur de fotoclub. Ie könt erop zeen dat het toen niks was. In 2015 is het verkoch an Maurice van de Boone. Den zag der wàl wat in en hef onmeunig mooi in oole staat teruggebrach. De meuite weard! Doar zo’j direct wiln wonn? Ie munt oe alleanig neet ofvroangn hoevölle dit allemoal hef ekost. Dat döt Maurice wàl…
