Vandage hew un fiksen tippel emaakt noar het schlössl van Rapunzel. Dit is gewoon un baarghutte “de Stabanthütte“, mear het zöt eroet as un klein kasteel (volgens de Oosteriekers…), en het wordt geregeerd duur de schone Rapunzel. Althans, dat was 10 joar geleane. Vandage he’w gennen Rapunzel ezeen, en zo schone wasse 10 joar geleane ok à neet. Loaw’t zo zengn, zie behuurn neet bie de knapsten. Miskien was dat wà de rean um ear Rapunzel te neumn en harn ze eur verstopt in’n toorn?
Het was vuur mie de eerste keer wà wier fleenk pokkeln. Heel wat aans dan da’k bie oons thoes un ommetje maakt. Wie gungn un kleine viefhonderd meter hoger, mear het kossen mie mear zweatn dan’k harre edach. Toch mear iets mear an de conditie doon..
‘s Morns hew nog un kleine opstartwandeling duur het dorp emaakt. Doar zag ik oondermeer dit mooie kippnhok “villa Kakelbont”. Mear ik zagge ok nog twee originele kistkalver. Volgens mie is dat bie oons à lange neet mear meugelijk, hier kan het gewoon nog. Un boer (wà un betje un pröttelboer) keak nogal voel toe’k un foto maakn, misskien ha’k munn zengn da’k van “Leckeres Tier” wazze? Of zoln ze dat hier neet kenn in Oostenriek? Ik zagge wa un bröt met twee mooie slogans erop. Kloarbliekelijk spölt hier dezelfde problematiek as in Nederlaand…
