in verbaand met de grote hitte hier, bi’w vandage mear oondergroonds egoan. Wie hebt de Maginot-linie bezoch, un serie van verdedigingswerken van vuur’n Tween Wereldoorlog.
Noa un Earsen Wereldoorlog veundn de Fraansken datte zich better mon’n verdedigen teangn de vijand oet het oosten, dus toen hebt ze un hele serie fortn en bunkers bouwt bie de greanze met Duutslaand. Dat wörn de Maginot-linie èneumd, verneumd noar un Fraansken minister van Defensie, den ok toevallig Maginot heetn 🙂 .
Ie könt oe hoaste neet vuurstelln hoevölle waark dit is èwes. Der bint onmeunige hoeveelheden beton vuur gebroekt (wàl iets mear as un kruuwaanke) om mear neet te sprekn oawer de kilometers electrische kabels die ter bint gebroekt want alles in de forten en bunkers mos electrisch wean. Zoln ze toen âl drok wean met het klimaat? Ok un Henk van de Knolle zol met zien’n kraan un paar joar (of iets meer) waark hemn èhad um alles oet te greawn.
Wat mie bie is èbleawn dat ze langs de oostgreanze van Fraankriek in slechts veer joar tied un gigantische verdedigingslinie in- en oet de groond hebt èstaampt, den van alle toenmalige moderne snufjes was vuurzeen. De Duutsers harn der het in juni 1940 ok knap lastig met. Alleanig duur de oawergave van Fraankriek kon’n de Duutsers de Maginot-linie zoonder völle meuite innemn.
Gelukkig is het greutste gedeelte van de Maginot-linie oonder de groond èbouwd en konn wie dit alles bie un temperatuur van 12 groad Celcius bekiekn terwiel het boetn 35 groad was. Is het toch nog aarns good vuur èwes…
