Wie sind vandage noar het Europees Parlement in Straatsburg èwes, want wie woln wà eawn kiekn in wat vuur omgeving allerlei Europese wettn wordt annenömn. Temear, umdat juust vandage er un besluut zol wönn ènömn oawer het herstel van de Europese natuur. Un wet den vuur Nederlaand (met name vuur de boern) heel noadelig kan oetpakkn. Helaas ko’w ‘s morns de zitting en stemming niet biewonn en wörn die wet doarumme natuurlijk ok annenömn (want aans ha’w wàl eawn fleenk met de schoone op de buro’s ètimmert, zoas Chroesjtsjov dat ok hef èdoan in de VN (1960)).
‘s Middaangs ko’w wàl noar binn en he’w ok nog un soort van debat mettemaakt in de grote zaale. Opvallend was dat er mear ongeveer 20 europarlementariers in de zaale zatn. De rest van de in totaal 505 EP-leden mos natuurlijk nog biekomn van ‘s morns (en de lunch) en lea te rössen. Het was ok nog un strak debat want iederene den het woord voern, kreag mear un paar minuutn de tied en dea dat ok nog in ziene eengste tale, kortom, doar was heel weinig discussie. Kloarbliekelijk is dit de beste maneere um un parlement van 505 leu an te pakn, zoonder dat alles oet de klauwn löp. De echte besluutn wordt èregeld in de achterkamertjes en in de speciale commissies, zodat er bie un EP-vergadering alleanig mear hoof te wörn èknikt of èschud (met het heuwd). Gen veurwaark dus….
En vuur de res he’w vandage roondeleupn in Neustadt, de Duutse wieke van Straatsburg met gebouwn in Pruusische stijl. Dizze wieke is duur de Duutsers in de 19e eeuw èbouwd as stadsoetbreiding. Grote gebouwn, brede stroatn, mooie parkn, joa de Duutsers wussen toe ok àl eur steampel te zettn.
