Umda’w vlak bie de Vogezen bint, hé’w doar vandage un stukn èleupn. De Vogezen bint un middelgebergte (neet al te hoge dus) dat an de westkaante van de Elzas van noord naar zuid löp. An de oostkante van de Elzas, net vuurbie de Rijn he’j dan wier het Duutse Zwarte Woud, wat völle lik op de Vogezen.
Wie harn un aardigen tippel oettezoch dwars duur het bos. Halverwege, op het heugste peunt, ha’w un gloepns mooi oetzich oawer de noord-Elzas. Vuur de res was het redelijk völle van het zelfde. Ik waandele doarumme leewer duur een cultuurlandschap woe’j völle mear ofwisseling in het landschap hebt.
Oonderweg kwamn wie nog wàl un apartn zuil teangn in’n baarm van de weg. Dit is un vuurbeeld van één van de eerste verkeerszuilen den is oppericht tijdens de Fraanske revolutie. Oorproonkelijk koompe van un kasteel oet de buurte mear dat is toen èsloopt met de Fraanske revolutie (raar toch…) Dizzen zuil is toen samen met de aandere zuiln van dat kasteel op verschillende kruuspeuntn in de buurte èplaatst. Der bint toen richtingspieln, plaatsnaamn en ofstoandn innekrast zodat de leu kondn zee woer ze hen mossen. Un soort ANWB-bord dus ofwel in dit geval un FGCF (Fédération Géneŕale des Cyclistes Francais)-zuil.
Saillant detail (dat lik ok wál Fraans :-)) : In’n Tween Wereldoorlog was un zuil omveer èhaald mear duur toodoon van de heer Haemmerlin, kruuwaangnfabrikant oet Saverne, isse noar’n oorlog wier oppericht. Ik har nog nooit van van dit maark kruuwaangs èheurd, mear met behulp van mien grötsten kameroad, Google, blik dat dit nog steeds un grootn spöller op de kruuwaangnmaarkt is.



