Wie hadn vanmiddag visite van kunnigen (hoe zeg ie dat in het Twents zoonder te vervaln in kennissen of vrienden?) en die brachen ok Bobbie met, un joonk, leef en spöls heunke. Bobbie veun vuural het strak gemeaide gezon van oonze Graads mooi. Hier konne alle kaantn oetstoewn zoonder bange te wean datte aans teangan leup. Zien naam dea mie direct deankn an Bobbie, het bekeande heunke van Kuifje. De kluurn bint aanders mear a’j der un klein hoarspoelinkje oawer hen zoln gooin, zolle der vuur duur kön goan. Zit wie alleanig nog met de vroage wie der dan Kuifje zol könn spöln. Dat is nog neet alleanig oppelöst met un hoarspoelinkje…
