Ken ie dat? Dan vroangt ze oe hoe het geet, en dan zeg ie “Ik magge neet klaangn (van’n dokter)”. Kiek, doar heb ik nò ok las van (van dat neet klaangn). Ofgeloopn wekke ha’w un eindejaarsbijeenkomst van het waark met’n motivational speaker”Kevin Weijers”. Normaal klik ik bie dit soort pröatjes weg, mear dizzen hà wà un interessant verhaal. Hee döt allerlei oetdagingen ofwà challenges en ene dervan is 21 dage neet klaangn (en scheeldn en roddeln). Dit is em oeteindelijk èlukt noa heel völle pogingen. Doel hiervan is um wat positiever in het leawn te stoan in plaats van steeds noar un aandern te wiezen at er wat verkeerd bie oe geet. Dizze challenge köj zelf in praktijk brengn duur 21 dage un wit armbandje um’n pools te doon . Telkens a’j klaangt mu’j em an’n aandern pools doon en mu’j wier opni’js beginn te teln met de dage. Hier bi’k dus vandage met begunn. Un echte oetdaging, want ie munt oons ‘s morns eens heurn prötteln a’w de kraante least. Ik deanke da’k pas oawer un paar moand hier kloar met binne. Het wordt toch niks, völ te meuluk vuur mie, wie bedach dat dan ok…(zit ik hier wier te klaangn?)
