17 februari 2024 – Hamburg – un tween dag

Hier zee’j de Nikolai-turm.Dat is un oawerblievsel van de Nikolakirche den in 1943 compleet wörn wegbombardeerd duur de geallieerden in operatie Gomorrha. Doar kwamn bie de bombardementen ongevear 45.000 burgers umme.

Noa de rondleiding he’w de Hamburger Kunsthallen bezoch. As earste zaggen wie dit knap grote schilderieje. Het dea oons deankn an de Nachtwacht, mear dan iets grötter….

“Mädchen mit Stier” ofwàl “Meakn met de bolle” van Lovis Corinth oet 1902. Ne beste bolle! ( en un skier wich)

Un kluurriek schilderieje van Mark Chagall oawer de brungn van de Seine (de Regge van Parijs).

Un schilderieje van Rembrandt: Simeon en Hannah in de tempel. Wat mie opväl was vuural de gedetailleerdheid van de plätte van Simeon, ie zeet de reempels gewoon zitn. Maria zöt der doarenteengn, slech oet…

Un schilderieje van Abraham van den Tempel: Portret van een patriciërsfamilie. Hele rieke leu die zoonder opsmuk woln wörn porteteerd. Vuurnamelijk zwarte kleere an, mear oondertusken straalt het er vanof dat ze omeunig rieke bint en dat ze dit geane wilt loatn zeen. Zie bint volgens de leste mode èkleed en eknipt. Eur dochter hef un parelen halsketting umme en ok parelen oorbeln. En ‘n perzik in de vrouwe eurn haand duudt op vruchtbaarheid, het huwlijk, onschuldigheid mear ok de keuze tusken good en slech (dit he’k neet allemoal zelf bedach …). Kortom un mooi schilderieje met heel völle informatie wa’j neet aaltied direct zeet.

Un schilderieje van Hendrick Avercamp: Winterlandschap. Mu’j es kiekn wat al die leu allemoal doot op het ies!

Het grötste standbeeld van Bismarck steet in Hamburg. Roem 31 meter hoge! Bismarck kreag het vuur mekaa dat de afzonderlijke Duutse staatjes wörn verenigd in één Duutslaand oonder leiding van Pruisen.
Daor bint nò discussies um het standbeeld weg te haaln umdat Bismarck ok wordt ezeen as un earsen Duutsen kolonisator.