Nog 161 dage en dan is het wier Kas! Um àlvaste in de goeie stemming te komn he’w vandage in Riquewihr un weenkel met kasspulln bezoch. Kearl, kearl, wat lea doar un hoop kas-pröttel, ik bedoole kas-spulln: van witte en roze kasbeume tot gekluurde kasballn en kleine trekkers en politeauto’s die in’n boom könt hangn. Ie kon’n der àlvaste genog inspiratie opdoon en geeld oetgeewn vuur de Kasdage.
Behalve den weenkel was Riquewihr un “alleraardigst” Elzas-stadje met allerlei pittoreske duurkiekjes en brocante-weenkelkes. Genog um un paar uur rond te loopn (wa’w dan ok heb’t èdoan…).
Umdat Riquewihr an de bekeande Route des Vins lig zee’j oaweràl wiengaardn. die natuurlijk ok op’n foto mossen! Dizze route dea mie trouwens deankn an de fameuze lichtjesroute bie ons oet 2013 , toe der ok un bekeandn/beruchen wiengaard anlea.
Vuurda’w Riquewihr bezochen ha’w ‘s morn ears het kasteel van Haut-Koenigsbourg bezoch. Dat is un kasteel oet de 12e eeuw wat nao un paar keer verwoest te wean (dat he’j smangs), begin 20ste eeuw duur de Duutsers volledig is oppeknapt noar de smaakn van toen. Het mos un middeleeuws kasteel wörn dat des Keizers waardig zol wean, dus ie zeet oaweràl in het kasteel ofbeeldingen en teksten oawer het leawn van keizer Wilhelm II (den kearl met de grote snorre). Kosten nog meuite wörn èspoard um het te restaureern, doar wörn zelfs un spoorliene noar het kasteel vuur anneleg. Al met al hebt ze dur veer joar oawer èdoan, en het resultaat mag ter wean. Het is één van de toeristische hoogtepeuntn van de Elzas met joarlijks un half miljoen bezeukers.
Persoonlijk veun ik der neet zo völle an, want ie zeet un kasteel dat helemaol “of” is en woer het ok heel drok is met bezeukers die van kamer tot kamer goat. Nè oole ruine van’n klooster of kasteel döt mie mear. Doar köj de fantasie nog bie laotn waarkn um oe vuur te steln hoe ze der vrogger leawn. En biekommend vuurdeel is dat het er ok neet zo drok is want hoevölle leu veendt die oole stene nò mooi?
