Vanof 2022 munt alle trekkers geregistreerd wean bie de RDW. Dit gebuurt, deank ik met mien gezoonde dosis wantrouwen, um de belastingsopbrengsten van het Riek te verhoongn, mear ja, dat zö’j neet snel gewaar wörn. Un ooln International 453 van mie vaa is nò ok an de buurte, want a’k wache tot tookn joar mu’k 140 euro betaaln. Het kost nò nog 18 euro, en dat is toch stukkn vuurdeliger.
Mear vuur de registratie ha’k un VIN (Voertuig Identificatie Nummer) neurig en dat is vuur zulke oole trekkers knap lastig te veendn en te leazen. Vuural het leazen van het nummer op het typeplaatje kossen mie völle meuite. Ik kon der gen sukela van maakn (vandoar un titel), mear met wat vergrootn van’n foto en het vergeliekn van het nummer met nummers van aandere oole International-trekkers is het mie èlukt. Ik heb un VIN en un bouwjoar (1974) van’n trekker. Un anvroag he’k innedeend, en vanof 1 januari 2022 wet het Rieke da’k un trekker hebbe. De belastinganslagen zölt doarnoa spoedig volgen…
