Ie hebt smangs van die dage da’j woln da’j better oet de döppe hadn èkekn. Zo ok vandage. Ik wasse àl un betje late oet het waark en toe’k op het station kwam koonk zo un wochenden trein inschoewn. Den stön àl kloar. Hee vertrök strak op tied (eigenlijk iets te vrog) mear alles leek good. Mear ja, noa vief minuutn heurn ik iets oawer Rotterdam Centraal en de ankomsttied hiervuur. En toen vuuln ik nattigheid. Zo’k wàl in un goein trein zittn? Het oetzich was ok àl aanders. En ja, het eerstvolgende station was Gouda in plaats van Amersfoort. In plaats van in un trein noar Eanske te stapn wa’k in un trein noar Rotterdam èstapt. Dus ik binne mear gauw in Gouda oettestapt en heb un trein terugge noar Utrecht ènömn. Vandoar he’k un trein noar Eanske ènömn, noar ears heel good te hemn èkekn of den inderdoad noar Eanske gung. Want ie kent dat sprekwoord van’n ezel…
