Wie goat elken morn um een uur of elne een köpke koffie dreenkn in zonne gemütliche alpnhutte. As echte Nederlaanders nemt wie dan natuurlijk wàl oons eengste koekje met (het mos eens te völle goan kosten), in dit geval un pläkn kooke van Snelle Jelle. Het pläkn Snelle Jelle hà bie mie in’n tuk van’n jas èzötn en was helemoal verdreeid. Mear ja, zoas ze zengt, het geet neet um de vorm mear um de inhoold en de Snelle Jelle smaakn der mie neet meender umme.
Ik weet neet of ie de reclame van Snelle Jelle kent, mear as iemand zo’n pläkn kooke op hef ègetn, dan isse tot boetngewone prestaties in stoat. In mie geval gebuurn dit ok, want toe’k later op’n dag op de lange lattn noar daaltn skiën, leek het wàl of ik neet meer konne remmn. Bochen maakn lukn neet mear en ik wasse eenn blauwe flits op de piste den rechtsreeks noar daaltn gunge in nieuwe toptiedn. Ik leake Tomba la Bomba wàl in ziene beste daangn. Ik konne nog net alle leu ontwiekn mear vuur de rest ha’k weinig controle oawer de skies. De puntn bleawn noar beneen wiezen en ik klappern met volle vaart oawer de piste. De zönne zat vol verwoondering te kiekn noar miene skikeunsten want de hele wekke was he un snelsen op de ski’s èwes en ik un langzaamsen. Wat dear zie vaa nò toch? Un verborgen talent wat er op un lessen dag nog eawn oetmos?
Vlak vuur’n eane van de piste koon’k met miene allerleste kraggen de ski’s omhooge trekkn zoda’k vaart meendern en d’r mear controle over kreag. De weele ofdaling wörn gelukkig “ohne probleme” beëindigd.
Un ervaring rieker bi’w de piste offegoan en noar hoes èjag. Tookn joar mear gen snelle Jelle wier metnemn a’w goat skiën…
