Wie hebt vandage un heel stuk èleupn duur de wijngaarden van de Elzas. Het was mooi wear: het zunke schean, doar warn wat wolkn en de temperatuur was boangn de 25 groadn mear nog onder de 33 groadn. Het landschap bestön vandage alleanig oet wienstökke en diesels dus weinig schaa en weinig ofwisseling. Vandoar datte duur ons achterof as prikkelend is classificeerd want het kossen oons nog wàl zweatn!
Wa’w oonderweg ok zaggen was un monument vuur Hari Bannwarth, un Elzasser Gerrit Kraa. Hee hef völle doan um het Elsässerditsch, het Elzassisch, in staand te hooln. Het Elzassisch is un variant van de Hoog-Duutse taal (het is dus gen Neder-Duuts of Neder-Saksisch zoas bie oons). Vrooger (joarn vieftig) kon 90 percent van de bevolking nog Elzassisch sprekn en verstoan. Rechtervoort kan dat nog mear 5 percent van de basisschoolleerlingen. Het gebroek geet dus hard achteroet. Wie maakt het hier zelf ok met a’w bievuurbeeld boskoppn doot en wat wilt vroangn, Alleanig de oole leu könt nog good Duuts, de jongeren kent alleanig mear Fraans en un paar woordn Duuts. En umdat wie better Duuts as Fraans kuiert, vee’w dat un gemis. Want oeteandelijk hebt er wie las van a’w met de verkeerde boskoppn toes komt…
