Ik binne vandage wier vuur de eerste keer noar kantoor èwes. De leste keer was volgens mie vurig joar september, dus het moch wà wier. A’j nò deankt, dat er völle is veraanderd op kantoor in die lange tied, dan he’j het mis. Dezelfde riege met volle verhuusdeuzen steet nog steeds pontificaal in de kantine te wochen op de eigenaars, die mear neet komt opdaangn. Ik deanke dat ze tookn joar, noada’w wie wier oet de volgende lockdown bint èkömn, der nog steeds stoat. Köj zeen in wat vuur ontzettend dynamische en hectische omgeving da’k waarke. Der is nog gen tied um deuzen op te ruumn…
