Vandage bi’k an de gaank ewes met mie hooltschuurkn. Den was begin van dit joar kets ummeweaid, dus doar mos nog wà un ni’jn komn vuur dat het hooltstokseizoen begeent. Nat hoolt stokn wordt aans ok zonne rokerige boele…
Vuur de hookpöale van het ni’je schuurkn he’k de pöale van un ooln schommel gebroekt. Dizzen ha’k à in 2006 offebrökn, en de pöale ha’k netjes bewaard want ie weet mear nooit wanneer ze mie van te passe konn komn. En dat is dus 15 joar later, bie un hooltschuurkn op un stea woe’k toe nog niks van of wusse.
Hetzelfde geeldt vuur de kruukoare, dat is un oold barrel den is gebroekt bie un bouw van het hoes. Kort samenevat: smearig, roestig en lek. Mear ja, wegdoon is ok zoiets, dus den he’k ok mear netjes bewaard. Vandage koon’k em dus mooi gebroekn um der beton in te mengn. Noa het gebroek he’k em schoonespuit en ik konne neet zeen da’k hem harre gebroekt, zovölle ooln cement zat er nog op.
Dit is volgens mie un heel mooi vuurbeeld van duurzaam bouwen, zoas dat rechtervoort het. Ik neume dit mear un vuurbeeld van ‘Aj wat bewaart, dan he’j wat’…
