Noa het dagelijks bezeuk an de plaatselijke rock & roll bakker vuur breudjes (un earsen foto), he’w vandage Colmar bezoch, het toeristisch hoogtepeunt van de Elzas.
Colmar steet bekeand um ziene vakwaarkhuze en ziene grachen met bootjes. Alles zöt er heel pittoresk en scheelderachtig oet en dat trekt dus drommn toeristen an, woeronder wieleu :-). Het grötse gedeelte van’n dag he’w duur Colmar èleupn um alles te bekiekn. Bie de grachen met bootjes mo’k deankn an de bootjes op de rivier Cam, vuurig joar in Cambridge. Dat neumn wie toen het Giethoorn van Engelaand. In het geval van Colmar ko’w dit dus het Giethoorn van de Elzas neumn. Zo wordt Giethoorn nog bekeander as Venetië…
Noa oons bezeuk an Colmar bi’w duurejag noar Eguisheim, àlwier zo’n pittoresk en scheelderachtig dorpje in de Elzas. Nöast alle vakwaarkhuuze en wienverkopers (toeristen kwamn met deuzen vol wien oet het dorp loopn) väl oons de kleine kaarke op woer dree groote ooievaarsnesten op zatn. Un officieeln vogel van de Elzas is un ooievaar en noa alle ooievaars die’w hier hebt èzeen, begriep ik dat helemoal. Der loopt en vleengt er hier genog van roond. Mear um ze boangnop de kaarke te loatn nösteln, veen ik net iets te völle van het goeie. Ik har ze àl lange weggestot. Mear misskien dat ze ze loat zitn, in de hoppe dat het geboorteciefer en dus het ledenantal van de kaarke omhoge wordt ekrikt? De tied zal het leern…
