Elken dag loop ik van de bushalte oawern un verharn pad noar de poorte van’t waark. Dizze dage zag ik un zwatn streep oawer un griezen steenslag loopn. Toe’k better keake, warn dit allemoal miegeampn die hier un pad oawerstökn. Kloarbliekelijk harn ze wat èveundn an de oawerkaante wat eur good te passe kwam. Dat wörn dan transporteerd. Het mooie en opvallende is, is dat ze un vaste route anheuln um oawer te stekn. Alleanig op dit stukn van maximaal vief centimeter breed stakn ze oawer. Zie harn genog ruumte op’n heeln pad, mear dat deedn ze neet. Zie harn hier genog an, mear harn ze neet neurig. En het verlöp ok nog zeer efficiënt.
Doar köw as leu nog van leern, vuural a’w het hele làànd wier wilt volbouwn met nutteloze gebouwn, industriegebieden, spoorlienn en weangn. Loaw mear ears kiekn met mekaa of het allemoal wàl zo neurig is en loaw dan alleanig de ruumte gebroekn woer waarkelijk behoefte an is. Um met un Biebelsen tekst oftesloetn (Sprökn 6:6) “Ga tot de mier, gij luiaard! zie haar wegen, en word wijs”…
