Ik heb vandage wier un ettape van het Marskramerpad eleupn. Dat is un waandelroute van Bad Bentheim (in Duutslaand) noar den Haag. Dizze route wörn vrooger eleupn duur de marskramers en hannekemaaiers oet Duutslaand die op zeuk warn naor waark en klaantn in Hollaand. Ik binne met dizze route ooit in 2011 met begunn, in 2012 met vearder egoan en doarnoa he’k un heel lange pauze van 12 joar (motivatieprobleemn?) eheuln tot dit joar. Vandage he’k un etappe leupn in de buurte van Deawnter woerbie het eindpunt het station van Deawnter was.
Teangnoawer het station steet oonderstoand standbeeld van Marthinus Theunis (twee keer un “h”) Steyn . Den ken ie natuurlijk allemoal. Toch? Ie weet wàh, den ooln president van Oranje Vrijstaat. He was van 1896 tot an 1902 president van dizze onafhàànkelijke boernstaat in wat nòh Zuud-Afrika heet. Steyn was een van de meest onverzettelijkste leiders van de Boern in’n oorlog teangn de Engelsen. Hee hef hard èvöchen teangn de Engelsen (samen met de ààndere Boern oet Transvaal en Oranje Vrijstaat) , mear hef het neet èwönn. In 1902 wörn de Vrede van Vereeniging èteaknd in, hoe kan het ààns, Vereeniging (un pleatske bie de Vaalrivier in Transvaal. De Boernrepubliekn Oranje Vrijstaat en Transvaal kreangn zelfbestuur in de Britse kolonie Zuud-Afrika.
Umdatte Steyn in Deawnter het Gymnasium hef bezoch (hee hef ok nog Leiden èstudeerd) steet hier zien standbeeld. In 1922 wörn duur het zich met ‘de Afrikaners stamverwàànt veulende Nederlààndse volk’, zoas op de plaquette steet te leazen, een standbeeld vuur Marthinus Steyn oppericht.
Wus ie trouwens dat de Engelsen in Zuud-Afrika de concentratiekààmpn hebt introduceerd? Doar wörn de vrouwn en wichter van de Boern in gevangn èheuln. In totaal bint er doar een kleine 28.000 (woervan 22.000 oonder de 16 joar!) um het leawn èkömn. Doarnöast bint er ok nog 20.000 inheemse Afrikaners um het leawn èkömn in dizze káámpn. Het verlees van Boern in’n oorlog was 7.000.
