Wat dee’k en woe was ik, toe dit of dat gebuurn? Dizze vroage köj oe stelln bie belangrieke gebeurtenissen, zoas de Twin Tower anslag in 2001, de moord op Pim Fortuyn (6 mei 2002) , en de kernramp van Tsjernobyl op 26 april 1986. En umdat het vandage 26 april is…, is de vroage woer’k wasse toe de kerncentrale in Tsjernobyl ontploffen.
Ik zatte exact 35 joar geleane in Baton Rouge (Louisiana) in Amerika vuur un oonderzeuk van de Landbouwuniversiteit Wageningen an de LSU. Iets met ureum in gebaald grös, Wa’k nog wete is da’k ter mie toe neet zo drok oawer maakn want ik zatte un gloepensen eane weg van Tsjernobyl. Het was in Amerika völle op het ni’js, doar wörn zelfs jodiumpilln ehamsterd, mear de wolke met radioactief materiaal dreef neet noar Amerika hen, en toe wörn het à gauw (letterlijk) de ver van mijn bed show. Doar was ok nog gen internet of mobiele telefoon, dus de communicatie met Nederlaand gung vuur mie ok neet zo vlot Al met al hef dat dus toe neet zo völle indruk op mie emaakt terwijl het hier in Nederlaand het allerbelangriekste was dat spöln. Bie oons toes monn bievuurbeeld de beeste wier op stal umdat ze het grös in de weide neet mochen vretn want dat kon radioactief besmet wean. Gelukkig is het noadehaand nog mettevölln in Nederlaand, mear ik deanke dat er in de Oekraïne meer slachtoffers bint evälln dan da’w weet. Het leste ni’js is dat ze Tsjenobyl op de Werelderfgoedlijst van de Unesco wilt hemn. Kriengt ze doar meer bezeuk…
En nò wachen op 6 mei. Woer wa’k toe in 2002?
