Zie zengt smangs dat de beste stuurlui an wal stoat mear in dit geval köj better zengn dat de beste koks met de haande in’n tuk stoat.
Ik konne vanaongd metdoon bie de kookclub oet Eanter . Hier maak ie onder leiding van un professioneeln kok un complete dree- of veer gangnmoaltied de’j natuurlijk doarnoa ok munt opetn. Ik zatte vanaond bie het team dat het ‘dessert’ (de term ‘toetje’ lik zo pak vla-achtig) mos maakn: wentelteefjes van sukerstoete met vaske aardbein. De aandere anwezigen bemeuin zich met het hoofdgerecht ( vaarknribey (un läpke) met pompoen/zeute eapel puree) of met het vuurgerecht (turkse stoete met tomaatn bruchetta). En natuurlijk warn der ok wat die niks te doon hadn, zoa’j op’n foto könt zeen. Die stönn met de haande in’n tuk en gaven ‘opbouwende’ commentaarn. Oonder die bezielende leiding wörn der èkokt en noa de tied ok ègetn. En zie kon’n doarnoa de haande oet’n tuk en de mouwe stekn bie het ofwasken….
