4 juli 2022 – Vrogger

Vandage he’k mie un pad emaakt, dwas duur de veeldbloomn hen. Ik was het zat um der met de slangn van de sproeiers umhen te sjouwn, dus dan mear der dwars duur hen! Het veeld met bloomn is toch ne weele boele (volgens de vrouwe en den kan dat weatn…), dus een pädje der duur hen kan ok wà.
Toe’k dizzen foto zagge mo’k deankn an un book wa’k vrogger met Kas heb èkreangn toe´k in de eerste klasse van de leagere schole zatte , ¨Het wegje in het koren¨ duur W.G. van de Hulst. Dat was toendertied un bekeandn schriewer, want he schreef ok oondermeer de klassiekers ¨Gerdientje¨, ¨In de soete suikerbol¨, ¨Rozemarijntje¨, ¨Peerke en zijn kameraden¨, e.g.z.m.d. (en goat zo mear duur). Allemoal beuke die vrogger bie oons op de leagere schole wörn eleazen. Rechtervoort least ze op schole wat van modernere snit, mear dizze beuke hebt toch völle indruk emaakt op de generatie den in de joarn 60 en 70 op schole zat (op mie tenminste wà). Misskien dat, a´j de titels anpast, ze wier opni´js wordt èleazen? Gerdientje¨ wordt dan ¨Chloé¨, ¨In de soete suikerbol¨ wordt dan ¨Bij Bakker Bart¨ , ¨Rozemarijntje¨ wordt dan ¨Rachel¨ (Reetsjel) en ¨Peerke en zijn kameraden¨ wordt dan ¨Pickworth met zijn matties¨. En W.G van der Hult mu´j dan natuurlijk op zien Engels oetsprekn ¨ Dubbeljoe Gjie ven de Hulst¨. Ik deanke dat Bol.com dan de vroage neet ankan…

Geef een reactie

Het e-mailadres wordt niet gepubliceerd. Vereiste velden zijn gemarkeerd met *