Duur’n storm Poly mo’k vandage met un umweg noar hoes. ’s Morns rea alles nog gewoon mear ’s middaangs warn alle treinen vanof Utrecht noar Amersfoort en Zwolle oet’n diens ènömn. Ik mosse toen via Arnhem en Zutphen noar Deawnter. In Deawnter koon’k wier oawerstappn op’n stoptrein den mie zoonder enige probleemn noar Riessen brach. En dat allemoal duur un storm met’n naam Poly! Ik har, noa alle onheilspellende berichen, der un langern en un zwöardern naam bie bedach mear gen Poly. Van den naam alleanig àl wo’j neet bange. Ik deanke dat het belangrieke is dat het KNMI de stormen un naam gef den oawereenkomt met de zwöarte van’n storm. Zo zo’j un lechen zommerstorm un naam Dientje, Jansje of Mientje köñn geewn en un zwoarn storm Berendina, Hendrina of Wilhelmina. Die leste naamn maakt gewoon indruk! A’j heurt dat storm Berendina der an koomp, dan wi’j oe zeker wàl waarn! Den zöj mear oawer oe henkriengn…
